Shillong, Iaiong 15 : Ka Meghalaya State Skill Development Society (MSSDS) kala pynpaw ia ka jing kwah ban ai jinghikai ia bun ki Nos na ka bynta ka lad iohkam ha Germany.
Haba pyntip ia kane ha ka sngi Ba-ar, ka Myntri ka koit ka khiah kong Ampareen Lyngdoh kala ong “Ka MSSDS sa shisien kala iakren bad kiba bun ki nongaikam, ki jaka sumar na Germany bad kila pynpaw ia ka jingkwah sha ka Sorkar India ba kan ai jinghikai shuh shuh ia ki nos khnang ba ki lah ban leit sha Germany bad kin trei kum ki Nos”.
Ka pyntip ba ka MSSDS kala pynkhreh ia u QR Code ia ki nongshongshnong, kiba dei ki GNM Nurse, ba kin scan bad ban long ki kyrtong.
“Ia ka kyrteng jong phi yn pynrung tang mar syn scan ia u QR Code, ia ka kyrteng jong phi yn sa phah sha ki nongaikam, ki ban sa thungkam iaphi ha ka kam nos bad hadien kan sa don ka jingjied bad ia ki kyrtong yn sa khot sha ka MSSDS centre ha Umsawli, ka ban sa plie noh shen” kala ong.
Ka Myntri kala pyntip ruh ba bun ki Centre ka MSSDS ha ki District kila treikam mynta.
