Shillong, Naitung 02: U Nongialam ka AITC ba don ha ka Liang Pyrshah Bah Himalaya M Shangpliang hynne ka sngi saitjain, ula kyntu ia ka Sorkar Jylla ba kan pynbeit noh kham kloi ia ka jingdawa jong ki Nonghikai Adhoc.
Une u MLA ka Mawsynram uba la leit jngoh ia ki Nonghikai ha iakhih hajan Secretariat, ula pynpaw ia ka jingiadon ryngkat bad ki Nonghikai, kiba la thiah miet la bad sngi ha surok mynta la 5 sngi.
Ki Nonghikai Adhoc kiba don hapoh ka lama jong ka Federation of School Teachers of Meghalaya (FASTOM), kila dawa ia ka Sorkar Jylla ba kan pynkiew noh ia ka tulop jong ki da T. 18000 bad ka increment ba 5% manla u snem.
Haba iakren bad ki nongthoh khubor, u Bah Himalaya ula ong ba u dap da ka jingsngewpangmet ban iohi ba ki nonghikai, kiba dei ki nongtei bad nongsaindur ia ka lawei jong ki Khynnah skul, ki hap ban shong miet la bad sngi ha surok ban dawa ia ka tulop kaba shongnia.
“Kila dawa ban pynkiew tulop naduh u snem 2019. Ka FASTOM kala pyntip ba ki Nonghikai kila dep iakynduh ia u Symbud Myntri Rangbah ka Jylla bad Myntri ka Pule Puthi bad baroh arngut kila kular ba ka Sorkar kala jam shakhmat ha kaban pynurlong ia ki jingdawa jong ki hynrei ki Nonghikai kim sngewtynnad satia tang ia ka jingkular ba mih na ki rymmiang shyntur” ula ong.
U Bah Himalaya ula ong ba ka rai jong ki Nonghikai ban pynbteng beit shakhmat ia ka jingiakhih ba dang iaid mynta ka dei namar ba ki sngew ba kila shah shet kylla ha ka sorkar na ka por sha ka por.
“Namar kata, mynta ki kwah baka Sorkar kan pynmih noh da ka hukum ha ka jaka jong ka jingkular na ki rymmiang shyntur” ula bynrap.
Une u Nongialam ka AITC ula kular ia ki Nonghikai ba un sa rah iakren ia kane ka kam bad ka Sorkar Jylla . “Ngan sa kyntu ia ka sorkar Jylla ba kan shimkhia ia kane ka jingdawa ba shonghok jong ki Nonghikai” ula ong.
