Shillong, Naitung 02: Ki Nonghikai Adhoc kiba don hapoh ka lama jong ka Federation of School Teachers of Meghalaya (FASToM), hynne ka sngi saitjain kila kyntait mardor ia ka jingkyrpad jong ka Sorkar Jylla ban weng noh ia ka jingiakhih ba khlem pud haba phah khubor ruh kaba shai ba ka jingkwah jong ki ka long tang ka jingpynkiew tulop bad ka 5% ka increment manla u snem.
“Ngin iashong hangne bad ngin ap”-ka dei ka jubab jong ki Nonghikai haba u nongaiktien jong ka FASTOM u Bah Mayborm Lyngdoh ula pan ia ka rai jong ki halor ka jingkular jong ka Sorkar ban sa shim rat ia ka jingdawa jong ki nonghikai Adhoc ha ka sien shong jingialangban wan jong ka Kynhun Myntri.
Ki Nonghikai kila iarahkti ruh kum ka dak ban pynpaw ia ka jingthrang ban pynbteng ia ka jingiakhih ba khlem pud, kaba la poi mynta sha ka sngi kaba san.
U Bah Mayborn u pyntip ba kane ka juh ka jubab kala mih ruh na ki Nonghikai Adhoc na Tura, West Garo Hills District ba ma ki ruh ki kwah ban pynbteng beit ia ka jingiakhih tad haduh ba ka Sorkar kala rai ban pyntreikam noh ia ka jingdawa.
Kane kala mih ruh tang shisngi hadien ba u Symbud Myntri Rangbah ka Jylla Bah Prestone Tynsong ula kyrpad ia ki nong hikai adhoc ba kin pynsangeh noh ia ki jingiakhih namar ka Sorkar kala ai ia ka jingkular da kaba shai kdar ba kan sa pynkiew noh ia ka Grant in aid sha ki skul ba iarap ka Sorkar.
Ha kajuh ka por, ki Nonghikai Adhoc kila pynrem ruh ia ka jingkren jong u Symbud Myntri Rangbah ka Jylla ba ong ba ka lah ban don kaei re kaei ha lyndet ka jingkyntait jong ki Nonghikai ban weng noh ia ka jingiakhih.
“Ngi la rai ban bteng beit ia kane ka jingiakhih bad ngi pynrem ia ki jingkren jong u Symbud Myntri Rangbah ba ka don kaei re kaei ha lyndet” ong u Bah Mayborn.
“Ngi ruh kwah ban phah ia ka khubor kaba shai ba ka jingkwah ba ngi don ka dei tang ka jingpynkiew ia ka tulop bad ka 5% increment manla u snem” ula bynrap.
Haba pynpaw ba ki Nonghikai kila ioh ia ka jingkyrshan na ki kynhun bapher bapher kynthup ki nongialam sain pyrthei, ki Sengbhalang, u Bah Mayborn ula ong ba kane baroh ka long kumne namar baroh ki tip ba “Ngi iakhun iala ka jong ka hok”.
Ula pyntip ruh b aka kynhun jong ka FASTOM kala dep aiktien lypa ha u Symbud Myntri Rangbah ka Jylla ba ka rai ban weng noh ia ka jingiakhih kan shong eh ha ka rai jong baroh ki nonghikai Adhoc.
