Shillong, Lber 23: U Chief Executive Member (CEM) ka Khasi Hills Autonomous District Council (KHADC) Bah Titosstar Well Chyne hynne ka sngi palei, ula pynshai ba ka Council kam pat ai satia ia kano kano ka No Objection Certificate (NOC) na ka bynta ban pyniasoh lynti rel na Tetelia-Byrnihat-Shillong.
Katei ka jingpynshai u Bah Chyne kala mih hadien ba u Myntri ka tnad Transport u Bah Sniawbhalang ula pyntip haka iingdorbar thawain ba ka sorkar jylla kala ioh iaka NOC na ka KHADC ban shna iaka lynti rel na Tetelia-Byrnihat- Shillong.
U CEM ula pyntip ba ka Council kam shim pat ai ia kano kano ka NOC ha kaba iadei bad katei ka bynta naduh u snem 2013 bad ula kyndit ban iohi iaka khubor ba na ka liang u Myntri Sorkar ula pynpaw ba ka sorkar jylla kala iohpdiang ia ka NOC naka KHADC ban shna iaka lynti rel.
Ula ong iaka projek ban iaid ka rel haka jylla, la sdang ban wanrah naduh u snem 1980-1981 bad naduh u snem 2013, ka KHADC kam shym la ai iaka jingmynjur ne ai iaka NOC iaka sorkar jylla ban shim ia ka jaka na ka bynta katei ka projek.
“Nga dap da ka jinglyngoh ban iohi iaka khubor, kaba la pynpaw ba ka KHADC kala dep ban ai ia ka NOC ban shna iaka lynti rel na Tetelia-Byrnihat-Shillong bad na ka liang jong ka district council, nga kwah ban pynthikna ia ki paidbah ka jylla ba ka Council kam shym la ai jingmynjur ne NOC ban sdang iaka projek iaid rel” ong u Bah Chyne.
Pule lang ia kane: Wanrah ka Sorkar MDA-2 ia ka mang tyngka ba kynthup ia ka jingiada mariang
Ula ong, hashwa jong u snem 2013, ka sorkar jylla ka donkam ban pan iaka NOC na ka KHADC na ka bynta ban shim jaka hynrei hadien ba la dep ban pynkylla iaka Land Acquisition Rehabilitation and Resettlement Act, ka sorkar jylla ka hap ban shim iaka NOC na ka KHADC tang ia ki jaka kiba hap ha ka scheduled area.
“Hadien u 2013, ka long kaba kongsan iaka sorkar jylla ban shim iaka NOC na ka KHADC ban sdang ia kino kino ki projek, kumta ka jingshim ia ki jaka ban shna iaka lynti rel ka lah ban mih hashwa ban pynkylla ia katei ka aiñ, hynrei kane ka EC kaba mynta kam shim la ai satia ia kano kano ka NOC ha kaba iadei bad katei ka projek” ong u CEM ka KHADC.
U Bah Chyne ula iathuh baka Council kala ioh pdiang haduh 38 tylli ki shithi jingpynkynmaw na ka sorkar jylla kaba la pan iaka jingmynjur jong ka KHADC ha kaba iadei bad ka jingtyrwa ban ai iaka jaka na ka bynta ban sdang iaka projek rel.
“Ka KHADC ka kwah ban pynthikna ia ki paidbah ba haduh mynta kam pat ai iaka jingmynjur ne NOC bad kumta ka Council kan sa pan jingpynshai naka sorkar jylla ha kaba iadei bad kane ka kam” ong u Bah Chyne.
