Shillong, K’lyngkot 11 : U AICC incharge ka Meghalaya Dr A Chellakumar ha ka sngi Saitjain ula ong ba ka Congress ka khlem phah ktien eiei sha ki Nongialam barim kynthup u Nongialam ka AITC Dr Mukul Sangma ba kin wan phai biang sha ka party.
“Em ngi khlem phah iakren iano iano ruh hynrei lada don kiba kwah ban wan iasoh sha ka congress, hooid ngi pdiang beit ia ki” ong u Dr Chellakumar haba iakren bad ki nongthoh khubor. Ula kynthoh ia kane haba jubab ia ka jingkylli la ka party kan iakren ia ki nongialam barim ba kin wan phai biang.
“Nga kwah ia ki briew ka Congress ba kin wan phai biang sha ka Congress ban pynkhlain ia ka congress ym tang na ka bynta ka jingmyntoi ka Congress hynrei na ka bynta ka jingmyntoi jong ka Jylla Meghalaya bad ruh ka Ri” ula ong.
Haba pynpaw ba ka Congress kam behthong satia iano iano ruh, u Dr Chellakumar ula ong “Baroh ki tip ia kaei kaba jia mynta hapoh ka Ri, kumta ngi pdiang iano iano ruh hynrei ngim iabeh thong iano iano ruh. Lada don kiba kwah ban wan iasoh, ai ba kin wan hi shakhmat”.
Haba kylli, ula ong “Nyngkong eh ki dei (Nongialam barim) ban shim rai dalade. Ai ba kin wan shakhmat bad ngin sa peit ia kata”.
