Tura, Jan 11: Ka Meghalaya Cricket Association (MCA), ryngkat ka jingiatreilang bad ka Tura District Cricket Association (TDCA), kila pynkhreh shaid shaid ban pynlong ia kawei ka jingialehkai jong ka lympung ialehkai ka BCCI-ka Colonel C. K. Nayudu Trophy ha Tura Alotgre Cricket Ground ha ka 25 tarik u Kyllalyngkot.
Katba kiba bun na ki jingiakhun kin long ha nongbah Shillong bad ha kiwei pat ki jylla, ka jingialehkai hapdeng ka Meghalaya pyrshah ia ka West Bengal kan long ha Tura. Kane kan long ruh kum u mawmer jong ka jingiaid shaphrang jong ka jingialehkai cricket ha rilum Garo.
Haba iakren bad u nongai khubor, u Salmitmat Marak, u dkhot jong ka TDCA bad MCA, ula pynthikna ba ia katei ka jingialehkai kan dei kaban shah ia ki paidbah ba kin wan ban peitkai, ha kaba kin don ruh ki jaka shnong na ka bynta ki nongpeitkai. Kane ka jingiakhun kan sdang ha ka por 8 baje Mynstep, ban plie lad ia ki riewieid cricket ba kin ioh ban sakhi ia kane ka jingialehkai.
Ka jingpynkhreh na ka bynta ban pynlong ia kane ka jingialehkai kala iaid shakhmat ha kaba la pyndep kumba 80% ia ki kam ki jam bad kaba sah sa 20% la khmih lynti ban pyndep hapoh ka 17 tarik u Kyllalyngkot ban pynthikna ba katei ka jaka ialehkai kala long kaba bit ba biang ban pynlong ia katei ka jingialehkai cricket.
Ka Alotgre Cricket Ground, kadei tang kane hi ka stadium ha Garo Hills kaba la tei da ka BCCI, ka ieng kum ka jingsngewsarong ia ka thain. Ka jingialehkai kadei kaba la khmih lynti ban kyntiew ia ka mynsiem jong ka imlang sahlang bad kan kyntiew shuh shuh ia ka jingialehkai cricket ha ka thain.
Ka Colonel C. K. Nayudu Trophy, kadei ka jingiakob ialehkai na ka bynta ki kynhun U-23 bad la ai kyrteng I akane ka lympung iakob ialehkai ha ka kyrteng jong u kapten uba nyngkong jong ka ri India ha ka jingialehkai ia ka Test Cricket u captain, C.K. Nayudu. La pynlong ia ka da ka BCCI bad kane ka jingiakob ka plie lad ia ki nongialehkai cricket kiba dang khynnah ban pyni ia ka sap ka phong ka jongki ha ki rynsan jong ka ri.
