Shillong, Rymphang 21: U Nongïalam ka Liang Pyrshah India Trinamool Congress (AITC) Dr. Mukul Sangma hynne ka sngi ula kynnoh ba ka sorkar synrop Meghalaya Democratic Alliance (MDA) kala donkti ha ka jyrsieh thied jaka ba palat T.140 ha Mawpdang Mawkhanu East Khasi Hills district.
Haba kren sha ki lad pathai khubor u Dr. Mukul ula kam ba ka sorkar MDA haka jingialam ka National People’s Party (NPP) kala shukor ïa ki nongshong shnong jong ka shnong Mawpdang Mawkhanu da kaba ki la thied ïa ka jaka ba heh haduh 807 akar na ki Agent khyndew ha ka dor kaba T.85 shi sq.ft kaba kot baroh T.298.98 klur.
Ula ong ba ka dor trai jong kane ka jaka ka long tang T.45 shi sq.ft katba kot baroh T.158.28 klur bad ka jingïapher kaba kot haduh T.140.7 klur.
U Dr. Mukul ula kam ba ia kane ka rai ban thied jaka la shim rai ruh haka jingialang ka kynhun Myntri Sorkar hadien ka jingai jingmut ka tnat Urban Affairs bad ka tnat Revenue & Disaster Management bad la shim rai khatduh da u Myntri Rangbah ka jylla.
“Kane ka jingshukor ka sorkar MDA iaki paidbah ka shnong Mawpdang Mawkhanu ka paw shai ba u myntri rangbah ka jylla bad ki myntri sorkar jylla kila don bynta ban ïasylla sniew bad ban lute ïa ka jylla haduh T.140 klur” la kynnoh u Dr. Mukul.
U Dr. Mukul ula ong ba kane ka jingshim rai ka sorkar jylla ban thied jaka ha ka dor ba rem hapoh ka shnong Mawpdang Mawkhanu East Khasi Hills ka pyni shai ba kane ka sorkar ka la pynlong iaka Meghalaya kum ka jylla ba bamsap tam duh hapoh ka ri India.
Ula ong ba kala dei ka por ban pynlong da ka jingtohkit halor kane ka jingshukor ka sorkar MDA iaki paidbah nong shong shnong Mawpdang Mawkhanu East Khasi Hills namar kane ka paw shai ba ka sorkar MDA kala bam klop iaka pisa kaba dei ban leit sha kito ki trai jaka kiba la die iala ki jaka haka jingshah ialam bakla bad ki Agent Jaka bala thung daka sorkar jylla.
