Shillong, Rymphang 21 : U National Vice President ka National People’s Party (NPP) bah Prestone Tynsong, hynne ka sngi ba-ar, kala ther tyngeh ia ka “jinglong arsap” jong ki seng sain pyrthei ba iatreilang ha ka Sorkar MDA haba phai sha ka kam pynbeit pud bad ka Assam bad kyntu ia ki paidbah ka Jylla ba kim dei shuh ban shaniah ia ki namar kim don jingmut satia ban shimkhia ha ka ban pynbeit ia u pud u sam.
Kane ka jingkren jong u kala mih hadien ki jingkular jong ki paralok ba don ha ka MDA (UDP) ha ki manifesto ba kin sa shong bishar biang ia ka Memorandum of Understanding (MoU) bala iasoi bad ka Sorkar Assam ban pynbeit ia ki jing iakajia ha ki 6 tylli ki jaka ba iakynad pud.
Haba iakren bad ki nongthoh khubor, u Bah Prestone ula pynpaw ia ka jingkyndit ba kum kine ki jingkular kila mih na ki paralok jong ka MDA namar “baroh ki sienjam bala shim ki dei kiba la leh da ka jingiasyllok lang bad barih ki paralok ha ka Kynhun Myntri”.
Ula pynkynmaw ruh ba ka Sorkar ba ialam da ka NPP kala khot ia ka jingialang jong baroh ki seng sain pyrthei (All Party Meeting) shuwa ban iasoi ia ka MoU ha ka 29 tarik Lber 2022. Ka Sorkar kala pynlong ruh ia ka jingiasyllok bad ki Autonomous District Council bad ruh ki Nongialam jong ki kynhun Sengbhalang halor kane ka kam.
“Ngi la ong ba kine ki dei ki jingiapynbeit shuwa ba ngin leit sha Delhi ban iasoi ia ka MoU. Ka dei kaba la leh haba shit ba shai” ula bynrap.
Haba khein ia kane ka jingleh jong ki paralok ka MDA kum ka “Jingleh arsap”, u bah Prestone ula ong “Hynrei mynta, ngam lah ban sngewthuh balei ba ka UDP ha ka manifesto kala pynpaw ba ka kwah ban pyndam noh ia ka MoU. Kila iaid da ka lynti ba long arsap bha, hynrei nga thikna ba ki paidbah ki sngewthuh ia kine baroh. Ka paw kumba kim pat sngewthuh”.
Haba pynpaw ba kiwei ki party kum ka AITC ruh kila ieng ha kajuh ka nongrim ban pyndam noh ia ka MoU, une u Nongialam ka NPP ula ong “Kine ki seng sain pyrthei, kiba kwah ban pyndam noh ia ka MoU, ka mut ba kim kwah ban don ka jingiapynbeit ia kane ka jingiakajia pud kaba la neh palat 50 snem. Ki kwah ban gin phai biang sha ka “Status Quo-Status Quo-Status Quo”.
“Namar kata, ki paidbah ka Jylla kim dei ban shaniah ha kine ki seng sain pyrthei namar kim don ka jingsngew ban shimkhia ha kaban pynbeit noh ia ka jingiakajud bad u pud u sam ka Jylla” ula pynkut.
