Shah thok u nong Assam ba thied jaka ha Barapathar
Nongpoh, Nailar 01 : Ka jingkynnoh die duh u Syiem ka Raid Marwet ia ki jaka ha khappud sha ki bar jylla kiba na Assam, ka dei ka jingkynnoh ba la don ka slem bha hynrei ka bym lah ban pynshisha. Mynta kane ka jingkynnoh kala mih biang da ka jingshah thok jong uwei u nong Assam ha ka kam iadie iathied jaka hapoh ka shnong Barapathar.
Une u nong Assam ula shah thok ha uwei u muslim ba kyrteng u Nurul Islam, uba la dep ban shim ia ka pisa kaba kot haduh T.10 lak na une u nong Assam.
Kane ka kam thok kala mih pyrthei hadien ba u trai jong kane ka jaka, ula mih ban pyrshah ia ka jingthmu wan kam trai da kaba pynshisha ryngkat ki kot ki sla ba pyni ba ka dei ka jaka kaba la ai pateng ha u da ki Kmie Kpa tynmen naduh ka por ba synshar ka Sorkar Bilat.
Une u trai jaka u kyrteng u Uma Shankar Mishra uba dei na ka shnong Mawpat, Shillong.
Kine ki arliang mamla kila iakynduh lang hynne ka sngi Palei ha Barapathar ha ryngkat ka jingiadonlang ki samla ka thain ban iamir jingmut aiu ban leh pyrshah ia u Nurul Islam uba kam trai bad die be-ain ia kane ka jaka ha Barapathar kaba don markhap ka Assam.
Haba iakren bad ka Shlem, une u nong Assam (u bym kwah pynpaw kyrteng ne dur) ula pyntp ba u dang shu thied shen ia kane ka jaka na u Nurul Islam ha ka dor ba T.12.50 lak. U pyntip ba ula thied ia kane ka jaka lyngba ka website OLX (online) kaba pyni ia ki kot ki sla ba u Nurul Islam u dei u trai jong ka jaka bad la register ia ka sha Assam.
Ula pynpaw ba da ka jingshaniah ia ki kot ki sla, ula siew ia ka pisa ba kot haduh T.10 lak sha u Nurul Islam hynrei hadien ula shem ba ula shah shukor bad lap ruh ba kane ka jaka ka dang hap hapoh Meghalaya.
Une u briew ula kynnoh pyrshah ia u Syiem ka Raid Marwet ba u donkti ha ka jingdie jaka ha khappud sha ki bar jylla bad ong ba dei ban tohkit ia ki kot ki sla/dulir pata ba pynbiang da u Nurul Islam ban lap ia ki jingshisha baroh.
Na ka liang u trai jaka u Uma Shankar Mishra, ula byrngem ban mudui da ka ejahar bad ban tan ruh ia u Nurul Islam sha Iingkashari namar ka jingkam trai jubor ia ka jaka.
Ki samla ka thain kila kynnoh ba u Nurul Islam u dei uba ju pynkulmar shnong bha ha ka thain bad u dei u briew uba don bynta ha ki kam pynibor na ka por sha ka por ban pynthut bad khanglad ia ka jingwan ki kam pynroi. Kine ki samla kila kyrpad ia ki bor Sorkar ban leh eiei noh pyrshah ia une u briew.
