Gangtok,Rymphang 8 :Kiba bun bah ki bynta jong ka jylla Sikkim ki la kynjah jar jar namar ka jingshah ktah na ka pakhang shnong kaba 12 kynta ba la khot pynlong da ka Joint Action Council halor ka jingshim rai jong ka iingbishar Supreme Court ban kynthup tynrai bar ri ia ki Nepali ka Sikkim ha ka 8 tarik mynta u bnai.
Ka JAC ka la khot da ka pakhang shnong kaba 12 kynta mynta ka sngi 8 tarik kaba la sdang naduh ka por 6 baje mynstep haduh 6 janmiet.Haduh mynta hi ym pat shym la ioh khubor halor kino kino ki jingjia.Na ka liang u Vice President ka JAC u Passang Sherpa ula ong ba kane ka pakhang shnong ka la long kaba iaid beit iaid ryntih.
Ka jingshim rai halor kane ka jingkhot pakhang shnong la shim da ka Joint Action Committee ha ka 7 tarik mynta u bnai hadien kiba bun tylli ki jingialang.
Lah ban kdew hangne bad ki dkhot ka JAC bad u President jong ka Sikkim BJP dang shen ki la iakynduh ia u Myntri kam pohiing ka sorkar pdeng u Amit Shah bad ioh ia ka jingpynthikna na une u myntri ban phah ka jingkyrpad halor katei ka jingshim rai jong ka SC, bad hadien ka jingiamir jingmut ka JAC kala khot ia kane ka pakhang shnong ym ban pyrshah iano iano ruh, kata ym ia ka sorkar jylla ne sorkar pdeng hynrei tang ban pynpaw ia ka jingiatylli.
Na ka liang u Pradhan u la kyrpad ruh ia ki volunteer bad ki nongiashim bynta ba kin ym leh ia kino kino ki kam ki ban pynthut ia ka imlang ka sahlang hynrei ban pynkut ia kane ka pakhang shnong da ka lynti jong ka jingsuk.
Lah ban kdew ba na ka liang ka Ministry of Home Affairs (MHA) ka la phah ka jingkyrpad hapoh Supreme Court ha kaba iadei bad katei ka jingpynbna tynrai bar ri ia ki Nepali ka Sikkim.
Lyngba ka twitter, ka Home Ministry ka la ong ba ka GoI ka ieng halor ka nongrim kaba skhem kaba katkum ka Article 371F jong ka Constitution kaba ia ka jingithuh bad ka jingiada ia ki nongshong shnong ka Sikkim ia kaba ym dei ban pynkylla da kumwei pat
