Nongpoh, Risaw 07 : Ka shnong Umkaduh, Ri-Bhoi District, kala kyndit bad shaiong ngain halor ka jingiap kyndit jong kawei ka Longkmie ba 27 snem, kaba la khlad tang da ki sngi ba leit bud iala u kurim sha shnong Maroid, kaba hap hapoh ka Mairang Police Station, Eastern West Khasi Hills.
Kane ka longkmie, kaba la tip kyrteng kum ka kong Sperli Syngkli, ka dei ka nongshong shnong jong ka Umkaduh bad ka don arngut ki khun.
Katkum ka jingïathuh U kñi Bah Mekhal Syngkli, bad u Rangbah Shnong Umkaduh Bah Phaintis Syngkli, ka Sperli ka la leit bud ïa la u kurim, u Kursur Mawlong, sha shnong Maroid ha ka sngi Siatjaiñ. Hynrei, haka sngi baar ki bahaïing ki la ïoh jingtip ba katei ka longkmie ka la khlad noh na ka pyrthei.
Ki la iathuh ruh, haka sngi baar ki bahaïing ryngkat bad ka shnong ki la leit sha ka shnong Maroid ban wanrah noh ia ka met jong katei ka longkmie sha shnong Umkaduh hynrei la kynnoh ba u kurim um shym la kren shai halor kaei ka daw kaba pynlong ia katei ka longkmie ban khlad.
Ki kynnoh ruh ba u Kurim katei ka longkmie bad ki Bahaïing hasem jong u ki khlem ap shuh wat tang bam pyndep iaka jingleh burom khatduh ia ka met jong katei ka longkmie bad dang step ki la leit phai noh shala shnong, kaba la pynlong ïa ki bahaïing jong katei ka longkmie ban don ka jing suba kaba sniew.
Halor kane ka jingsuba, ki bahaiing ki la pyntip noh sha ki pulit ka Ri-bhoi kiba la leit shimti ia ka met jong katei ka longkmie sha civil hospital Nongpoh ban leh iaka post mortem
Kila pynpaw ruh ba kane ka jingkhlad ka longkmie, kum ka iing ka sem, ki dap daka jingsngewsih kaba khraw bad ki kyntu ruh iaki bor pulit ba kin tohkit bniah khnang ban tip iaka jingshisha.
