Tinsukia, Naitung 2: Uwei u ehrang jong ka kynhun seng lehnoh ULFA (I) u la kyllon iap ha ka jingiather kuli bad ki shipai bad pulit ha ki bynta jong ka Kakopathar ka ba hapoh Tinsukia district jong ka Assam.
Ia une u ehrang la tip kyrteng kum u Gyan Asom, ong ki pulit.Une u dkhot la ong ba u la kyllon iap hadien ka jingiather kuli ka ba jur bha hapdeng ki hynriew ngut ki dkhot jong ka ULFA (I) bad ki bor shipai ryngkat ki pulit ha Kakopathar.
Ki bor pahara ki la pynlong ia ka jingkhynra ka ba jur hadien ba ki la ioh ia ka jingtip ka ba thikna halor ka jingdon jong ki hynriew ngut ki ehrang ka ULFA (I) ki ba shong riehtngen hapoh kawei ka iing ha ka shnong Dapather Majgaon ka ba hap hapoh Kakopathar police station jong ka district.
Ia kane ka kynhun jong ka ULFA-I la lamkhmat da u nongialam ba triem jong kane ka kynhun ka ba la shah khang pyrshah u Rupom Asom. Kiwei pat ki dkhot jong kane ka kynhun ki kynthup ruh ia u Rinku Asom, Mriganka Asom bad u Uday Asom nalor u Gyan Asom.
Katkum ki khubor la iathuh ba kine ki bor pahara ki la ngat ha ka jingshah ther kuli katba ki dang pyrshang ban leit tur sha katei ka iing. Kine ki lehnoh la ong ba ki la kawang ruh da ki artylli ki bom grenade pyrshah ia ki bor pahara. Hadien kane ki bor shipai ryngkat ki pulit ki la pynphai kylliang ka ba la wanrah ia ka jingiap jong utei u nongialam ka kynhun.
Shuh shuh ha kane ka jingiather kuli u Rinku Asom ruh u la ngat ha ka jingmynsaw namar ka jingdei kuli. Hashwa ba kin phet krad na katei ka jaka, kine ki dkhot ki ba ioh lait im ki la iehnoh ia ki artylli ki pla ki ba don ia ki bom grenade.
