Tura, Naitung 02: Ki paidbah Nongleit iew kiba ju leit siew leit tda ha Iew Tura Nakham manla ka sngi saitjain, kila shu lait salit na ka jingjia ba shyrkhei hadien ba kawei ka trok shipai BSF, kala leit ban tynrah ia 6 tylli ki kali ba ieng harud surok bad pynmynsaw ia arngut ki briew.
Kane ka jingjia kala jia hynne step por 11.30 baje eiei, kaba dei ruh ka por baka Iew Nakham ka dang hui hui bha da ki nongleit iew ban siew ban tda marbam mardih.
Ka Trok BSF kaba don u nombor AS01-KC-1775 kaba iaid lyngba kane ka surok ba khapngiah, kala mih jingthut kynsan kynsan haduh ba u nongniah um shym la lah ban tehlakam ia ka kali. Kane ka trok kala leit ban rat ia bun tylli ki kali hashuwa ba kan kylla.
U nongniah bad u nongbud jong kane ka trok kila mynsaw ha kane ka jingjia.
Ki kali kiba la shah rat ha kane ka trok ki kynthup ia ka kali ba don u nombor ML-09A-7499,(Datsun Redigo), ML08A5001(Maruti Gypsy), WB-24Y-4936(Maruti Alto), WB-22U-1145(Hyundai i10), AS-01E-2600(Maruti 800) bad ka AS-01/AG-1480(Maruti 800).
Kat kum ka jingiathuh ki Pulit ka Tura la ong ba kane ka trok ka dei jong ka 181 battalion bad ka daw jong kane ka jingjia ka dei namar ka jingbym treikam shuh ka brake. Hynrei ki ong ba mynta ki dang ap ia ka kaiphod na ki Motor Vehicle Inspector (MVI) ban pynthikna ia kane ka daw.
Ki 4 ngut kiba mynsaw kynthup ia kawei ka Longkmie, la ongba ki shu mong malu mala bad la sumar ia ki ha Tura Hospital. Ia kane ka jingjia la register ejahar ha Tura Police Station bad ka jingtohkit mynta ka la iaid shakhmat.
