Nongpoh, Rymphang 19: Ka Nongpoh Town Shopping Complex jong ka Meghalaya Urban Development Authority, kala kylla long ka ktem jong ki nongdih kyiad, dih droks bad ki kam awria ba khlem por khlem samoi hapdeng eh jong ka sor Nongpoh, kiba la shim kabu ia ka jinglong kynjah bad jinglong laitlan ban rung ban mih hapoh kane ka Iew.
Ki jaka kiba kylla ktem ki kam sniew ha kane ka Iew ki dei ka Parking Lot kaba don ha khrum duh jong ka Iew lem bad ki katto katne ki mala namar ka jingbym don ki briew ki ban shong ha ki dukan ne ki stall kiba la shna ban pynlong iew.
Ka parking lot kaba lah ban iarung iamih katba mon, ka dei ka jaka kaba ishyrkhei duh bad kane ka jaka kala satah da ki jaboh jabain bad ki bitor kyiad nalor ka jingleit bar pathar jong ki briew haduh ba ka jaka kala sma iwtung hi khait.
Ka mala ba lai bad kaba halor duh jong kane ka Iew kala kylla long kum ka Lovers Paradise ne ka paradais ki shijur nalor ki kam iashong dih kyaid bad kiwei kiwei.
Ia kane ka jinglong jingman jong kane ka Iew la lap ha ka jingleit jurip jong ka Seng Hynniewtrep Youth Council- Ri-Bhoi District lem bad ki nongthoh khubor ka Ri-Bhoi hynne ka sngi Nyngkong.
Halor kane ka jingshem, ka HYC hapoh ka jingialam u Secretary samla Tony Shylla, hadien ka jingleit jurip, kila leit ban buh da ka shithi ujor sha u Deputy Commissioner ka District ba un tuklar bad leh eiei noh mardor bad dawa ruh ba dei ban pyndait noh da ki kor CCTV ha kane ka jaka nalor ban pynkhlain ia ki nongap pahara khnang ba kan wanrah ia ka jingshngain ha kane ka Iew.
U Samla Tony Shylla ula kynnoh ba kane ka jinglong jingman ha kane ka Iew ka dei baroh na ka daw ka jingbym don ki nongpeit pyrman bad nongpyrrkhing kaba thikna.
