Shillong, Rymphang 19 : U Myntri Rangbah ka Jylla Conrad K Sangma ula pyntip ba ka Sorkar Jylla kala rai ban ailad ia ki District Selection Committee ba kin mynjur hi iala ki jong ki Reservation Roster na ka bynta ki kam ba lait hapoh ki District.
“Ngi la dep thoh sha ki DSC. Ngi la ai ka jingbthah ba naduh mynta, ka Reservation Roster jong ki kam ba lait ha ki District yn ai jingmynjur noh da u Chairman ka District bad kumta ki kot ki sla kim donkam shuh ban wan sha ka Tnad Personnel. Ngi la dep shim ia kane ka rai” ong u Conrad haba jubab ia ka short duration discussion bala wanrah da u MLA ka UDP Renikton Lyngdoh Tongkhar haba iadei bad ka jingslem jong ki DSC ban pynlong eksam bad pynmih result.
Ula ong ba ki Deputy Commissioner (DC) ki don ia ka bor mynta, hood kin hap bud ia ki kyndon treikam, ban pyniaid shakhmat ia ka jingthungkam khlem da shim shuh ia ka jingmynjur na ka tnad Personnel.
Nalor kane, u Myntri Rangbah ula pyntip ba ka Sorkar ka khlem pat pynkylla satia ia ka kyntien ha ka 1972 Office Memorandum ba iadei bad ka Reservation Policy.
