Shillong Jymmang 15: Ka Myntri ka sorkar jylla kaba khmih iaka tnad ka koit ka khiah ka Kong Ampareen Lyngdoh hynne ka sngi Nyngkong, kala pynpaw ba ka long kaba donkam iaka North Eastern Institute of Ayurveda & Homoeopathy (NEIAH) ban leh ia ka jingwad bniah ne Research halor ki dawai kynbat tynrai bad ia ka rukom ai jingsumar tynrai hapoh ka jylla.
Haba iakren bad ki nongthoh khubor hadien bala wai ka jingialang plie ia ki 6 tylli ki Building kiba dang shu dep tei thymmai jong ka NEIAH da u Myntri ka sorkar pdeng uba khmih iaka tnad Ayush u Sarbananda Sonowal, ka Kong Ampareen Lyngdoh, kala ong “U Myntri ka tnad AYUSH ula iawer ia nga ban iadonlang bad u ha ka jingialang kaba heh kaban long ha Delhi ha ka 18-19 tarik u Jymmang. Ngin hap ban iakren halor katei. Ka NEIAH kadei ban shim ia baroh ki lad ban pynlong ia ka jingwad bniah ha kaba iadei bad ka rukom sumar tynrai kaba la leh da ki jaidbynriew Garo, Khasi bad Jaintia”.
Ka Kong Ampareen ka iathuh ba u Myntri ula pyntip ba ka sorkar Pdeng kan pynthikna ba ki nongai dawai tynrai ka jylla ki dei ban shah kynthup lang ban ioh iaka jingmyntoi katkum ka jingthmu jongka sorkar pdeng haba ong “Ngan ialeh ha kaban kyntiew ia kane bad ngan iakhun ha ka ban pynthikna ba ki nongai dawai tynrai kin ioh iaka jingmyntoi na kane ka Institute kaba don ha Shillong”.
“Nga lah pynsngew ha u Myntri ba ki lah ban wanrah iaka jingai jingsumar lyngba ka AYUSH hangne. Ngi hap ban pynthikna ba ki paidbaa kin lah ban kot bor ha kaban ioh iaka jingsumar ia ka jingpang ka jongki bad ka don ruh ka jingkular kaba heh ba ka AYUSH kan long noh ka bynta kaba kongsan ha ka liang ka koit ka khiah. Kan long ruh shi bynta haka rukom ai jingsumar bad kaba halor iaka Homeopathy. Kumta ngi donkam ban iakhun ba ki nongai dawai tynrai kin ioh lem iaka lad ban ioh jingmyntoi na kane ka Institute”.
