Shillong, K’Lyngkot 26: Ki pulit ka East Garo Hills ki la ioh ban kurup bun bah ki tiar ialeh kynthup ki tiar pynbthei na kawei ka khlaw ha ka jingkhynra hajan ka shnong Dura Bawegra ha ka step 25 tarik Kyllalyngkot.
U Superintendent of Police (SP) East Garo Hills u la pyntip ba ia ka jingkhynra la pynlong ha ka por kumba 1:00 baje mynstep hadien bala ioh jingtip ba thikna.
Ha ka kynhun ki Pulit ba leit khynra la don lang u Superintendent of Police, Additional Superintendent, ki heh ophisar jong ka tnat pulit East Garo Hills bad ki Pulit ka Special Operations Team (SOT).
Ha katei ka jingkhynra, ki pulit ki la lap ia shibun ki tiar ialeh bad ki tiar pynbthei kiba la tep bha hapoh khyndew ha katei ka jaka.
La suba ba ia kine ki tiar ialeh lah ban buhrieh ki dkhot jong ki seng lehnoh barim, kynthup Garo National Liberation Army (GNLA) bad ka United Liberation Front of Asom (ULFA).
Ki tiar kiba la ioh ban kurup ki kynthup kawei ka suloi AK-56, AK magazine, lai tylli ki pistol kiba don ar tylli ki magazine, kawei ka suloi shna hu, 7 tylli ki tiar shna bom, 99 tylli ki kuli AK 7.62, 4 round ki kuli 7.65 mm, 50 tylli ki electric detonators, 11 tylli ki shotgun cartridges, 1 bom IED bad 3 tylli ki pressure cooker.
Ia u bom IED la lah ban pynlip noh da ki pulit Bomb Squad East Garo Hills.
Hadien ba la ioh kurup iaki tiar ialeh, ki Pulit kila Register Case ha Williamnagar Police Station vide Case No. 04/2026 hapoh ki kyndon Sections 25(1A) bad 25(1B) jong ka Arms Act bad Section 5 jong ka Explosive Substances Act.
Ka jingtohkit kaba kham bniah ka dang iaid mynta ban lap ia kiba donkti ban buhrieh iaki tiar ialeh bad ban lap ia ki jingiadei kiba lah ban don bynta bad ki kynhun lehnoh.
