Shillong, Rymphang 24 : Ki Pulit ka East Jaintia Hills kila ioh kem ia arngut ki nongkhaii droks bad ioh kurup ia u heroin ba 204 gram ha ka jingtalasi kali ha Umkiang Out Post ha ka miet sngi U Blei.
Kat kum ka jingpyntip u Superintendent of Police Pankaj Rasgania, ia kine ki briew bad u droks la ioh kurup na kane ka kali Alto K10 ba don u nombor AS11-R-1523.
U pyntip ia kane ka kali la pynsangeh ha ka por 11:30 mynmiet ha ka jingtalasi kali bad na kane ka kali la ioh kurup haduh khathynniew tylli ki synduk sabon ba thep ia u heroin.
Ki arngut ki briew kiba shah kem ki kyrteng u Suhal Admed ba 20 snem, uba dei na Tarapur, Kalain bad u Aktar Hussain, 37 snem uba dei na Kali Nagar, Shiv Narainpur, kiba hap hapoh Cachar District, Assam.
Ia kine ki briew la pynngat hapoh ka kyndon NDPS act bad ka jingtohkit mynta kala iaid shakhmat.
