Shillong, Naiwieng 20 : Ka Directorate of School Education and Literacy kala khot pynlong ia ka jingialang ban iasyllok bad ki nonghikai kiba shakri ha ki skul deficit ha ka 30 tarik Naiwieng, kum ka jing pyrshang ban sngewthuh ia ki jingeh ba ki don bad ban iapyrkhat ia ka lynti ban pynbeit ba mynjur lang halor ki jingdawa jong ki.
Ha ka shithi bala phah ha ka 20 tarik Naiwieng, ka Director of School Education and Literacy, Richa Kulkarni kala pyntip sha baroh ki District School Education Officer bad Sub-Divisional School Education Officer halor kane ka jingialang.
Ia kane ka jingialang la pynbeit hadien ka jingkut jong ki eksam ba dang iaid mynta, ka ban iai bteng haduh ka 27 tarik Naiwieng, 2026, khnang ba kan nym pynkih ia kano kano ka jingpynthut ia ka eksam. Yn pynlong ia ka ha ka por 3 baje janmiet ha MTTA Conference Hall, DERT Annex, Malki, Shillong.
La kyntu ia ki DSEO bad SDSEO ba kin phah ia san ngut ki nonghikai deficit na ki skul deficit bapher bapher kiba hap ha ki district jong ki, ba kin wan sha ka jingialang. La pyntip ba yn ai ruh ia ka TA bad DA ia kine ki nonghikai, bad la bthah ia kine ki Ophisar ba kin phah ia ki jingtip ba bniah halor ki nong hikai ba ki jied hashuwa ka 27 tarik Naiwieng kaba khatduh eh.
Ia kane ka shithi la phah sha ka DSEOs ka Shillong, Jowai, Khliehriat, Nongpoh, Nongstoin, Mawkyrwat, Tura, Williamnagar, Baghmara, Ampati bad Resubelpara, bad ki SDSEOs ka Shillong, Jowai, Khliehriat, Nongpoh, Nongstoin, Mawkyrwat, Tura, Williamnagar, Baghmara, Ampati, Resubelpara, Sohra, Mairang, Amlarem bad Dadenggre.

