Shillong, Rymphang 24 : U Myntri ka Tnad PHE Marcuise N Marak, ula kular ba un sa bthah ia ka Tnad PHE ba kan eksamin iaki tyllong um kiba don marjan ka Marten namar ka jingsheptieng ba kane ka jaka theh niut kala pynjaboh lut ia ka um.
Kane ka jingkular kala mih hadien ba u MLA ka Mawlai ula kyrpad ia u Myntri ba un phah leh ia ka jingtest kat kum ka jingstad saian (scientific study) ia ki tyllong um ba don marjan ka Marten, kaba u ong ba ki nongshongshnong ka thain kila kiar ban pyndonkam namar ka jingsheptieng ba ka um kala jaboh.
“Ka Marten kala don naduh u snem 1930….ki nongshongshnong kila sangeh ka leit tong um namar ka jingtieng ba ka um kala jaboh” ong u MLA ha Iingdorbar.
Haba jubab, u Marak ula ong ba ka jingwad bniah ia ki tyllong um hi lah ju leh da ka Central Ground Water Board hynrei “namar ba u dkhot u kyrpad, ngan sa phah eksamin” ula kular.
