Guwahati, Jylliew :Hadien ba ka jingshlei um ka dang iai bteng ban syllad ia ki bynta jong ka Assam, na ka liang u nongialam niam ba hakhliehduh ka Tibet u Dalai Lama u la pynthikna na ka bynta ban noh synniang lem sha kane ka jylla.
Katkum ki khubor la ong ba u Dalai Lama u la phah da ka shithi sha u Myntri Rangbah (CM) ka Assam u Himanta Biswa Sarma ha ka ba u la pynpaw ka jingsngewkhia ka ba jur halor ka jinglong jingman ka ba dang iai bteng ha kane ka jylla namar ka jingshlei um.
“Kum ka dak ka jingiadon bynta lang bad ki nongshong shnong ka Assam, Ngan noh ia u synniang na ka Gaden Phodrang Trust ka jong Nga na ka bynta ban aijingkyrshan lem ha kane ka bynta,” ong u Dalai Lama ha ka shithi. Ha kane ka shithi sha u CM ka Assam, u la pynpaw ruh ka jingsngewkhia ka ba jur halor ka jingduh jong ki mynsiem briew kumjuh ki jingdon jingem baroh.
Nalor kata u la ong ruh ba ka long ka ba sngewkhia jur ba ka jingsyllad u ‘lapbah ia ki bynta ka Assam bad kiwei pat ki bynta jong ka ri India la iohi ba ka la wanrah ia ka jingjulor ka ba shyrkhei man la ka snem.
“Nga pynpaw ka jingsngewsih halor ki jingeh ka ba ki paidbah ki la hap ban mad namar ki jingshlei um ba dang shen ha ka jylla jong phi.Nga tyrwa ka jingsngewlem na ka bynta jong phi, ki ba haiing hasem ki ba la duh noh ia la ki ba ieit ba thoin bad baroh ki ba la shah ktah ha ka jingshlei um,” ong shuh shuh u Dalai Lama ha katei ka shithi.
