Guwahati, Jylliew 21:Ka jinglong jingman na ka jingshlei um ha Assam ka ba la shim lypa ia ka jingim jong ki 82 ngut ki briew haduh mynta ka dang don hapdeng ka jingsyier ka ba khraw, kata hadien ba ka wah Brahmaputra bad ka wah Barak lem bad ki shnat wah jong ki, ki la shlei kynsan hynne ka sngi ba Ar ka ba la ktah ia kumba 48 lak ki nongshong shnong.
Kumba 11 ngut ki briew ki la khlad noh bad hynniew ngut kiwei pat la pynbna jah rngai ha kine ki 24 kynta ba la dep.Ki heh sorkar ki la ong ba ki dkhot ka tnat NDRF na Bhubaneswar ki la wan poi ha Cachar na ka bynta ban aijingiarap.
Ka jinglong jingman ha ki artylli ki district jong ka Karimganj bad Cachar ki ba don ha ki jaka them jong ka Barak ki dang iai don hapdeng ka jingsyier namar ka jingnangkiew jong ka um ha ka wah Barak bad ki jaka them ka Kushiyara.
Na ka liang u Myntri Rangbah ka jylla, u Himanta Biswa Sarma u la ong ba sawtylli ki unit na ka tnat NDRF na Bhubaneswar ki ba don 105 ngut ki dkhot ki la her sha Silchar na ka bynta ki kam aijingiarap ha ki jaka them ka Barak. U la ai ruh ka jingkhublei ka ba kyrpang ia u Myntri ka sorkar pdeng u Amit Shah halor kane ka jingai jingiarap.
Haduh kumba 2,07,143 ki nongshong shnong ha Cachar bad 1,33,865 ngut ha Karimganj ki la shah ktah.Ha baroh haduh 48 lak ngut ki briew ki la shah ktah ha ki 32 na ki 36 tylli ki district jong ka jylla kat haduh mynta, kata hadien ka jingwan syllad jong ka jingshlei um ha ka kylla ka ba ar.
Napdeng kito ki district ki ba la shah ktah jur ki kynthup ia ka Barpeta ka ba don kumba 12,30,721 ngut ki nongshong shnong ki ba la shong halor ka um, kata bud sa ka Darrang ka ba don 4,69,241bad ka Bajali ka ba don kumba 3,38515 ngut ki nongshong shnong, kane ka long katkum ka kaiphot ba la pyllait da ka Assam State Disaster Management Authority (ASDMA).
Shuh shuh kane ka jingshlei um ka ba la iai bteng na ka jinghap slap ka la ktah ia ki 125 tylli ki revenue circle bad 5,424 ki shnong, katba ia kumba 2,31,819 ki briew ki ba la sahkut la hap ban pynkynriah sha ki 810 tylli ki jaka shong shipor.Ki kynhun aijingiarap ki la lah ban pynkynriah noh ia kumba 11,292 ngut ki briew bad 27,086 ki jingri ha kine ki 24 kynta ba la dep.
