Shillong, Jylliew 21: Kum shibynta jong ka jingrakhe ia ka International Day against drugs abuse and illicit trafficking 2022, ka Tnad Social Welfare bad ka Tnad Pulit, kila pynlong ia ka jingialap pyrshah ia une u jingdih ba sniew ha Nongbah Shillong.
Ka Ophis District Social Welfare Officer ka East Khasi Hills, Shillong kala pynlong ia ka prokram roadshow ha iew Nongmensong ban pynsngewthuh ia ki paidbah halor ki jingma bad ki jingktah jong u droks ia ki jingim briew bad ka imlang sahlang.
Haba kren ha kane ka prokram, i Kong ML Warjri DVPO, District Child Protection Unit ka East Khasi Hills ila batai halor ka jingthmu jong kane ka prokram bad ong ba ka jingkyrni dih droks lane kino kino ko jingdih pynbuaid, kila dei ki khniang jingpang ha ka imlang sahlang
Ine i Ophisar ila khot ia ka jingiatreilang jong baroh ki nongshongshnong, ki sengbhalang bad ka imlang sahlang ban rat dyngkhong ia kine ki khniang jingpang na ka bynta ka bha ka miat jong ki khun samla ka Jylla.
Ka Ophis u Superintendent of Police ka East Khasi Hills ha ryngkat ka jingiatreilang bad ka TULBA kila pynlong ia ka rally thuk thuk na ISBT Mawlai sha Madan Iewrynghep bad ia kane ka rally la khaweh lama da u Superintendent of Police ka District Bah Sylvester Nongtner.
Haba kren ha ka jingialang, u SP ula ai khublei ia ka TULBA halor ka jingpyniaid ia kane ka rally ban ai jinghikai ia ki paidbah ba kin kiar na ka jingdih ia u droks bad kiwei kiwei ki jingdih haba kyntu ruh ia ki samla ba kim dei satia ban ngop ha ki shrip jong u droks bad kiwei kiwei ki jingdih.
Kumjuh ruh ki Pulit ka Mawkynroh Police Outpost kila pynlong ia ka rally pyrshah ia u droks ha Mawlai kaba la sdang na Mawtawar By-pass bad pynkut ha Ophis u BDO ha Mawtawar. Ia kane ka rally la kaweh lama da u Officer Incharge ka Mawlai Police Station.
Haduh hynriew tylli ki skul na ki jaka ba Marjan kiba la pynmih ia kumba 250 ngut ki Khynnah skul kila iashimbynta ha kane ka rally ryngkat ki dkhot ka seng Longkmie Mawtawar Pyllun, Seng Samla, bad ki Nongialam Shnong ka Mawtawar.
Ki Nongiashim bynta kila rah lang ia ki banner bad ki placard kiba don ia ki jingthoh pyrshah ia u droks bad ki jingdih pynbuaid, ban pynsapriang ia ka khubor sha ki nongshongshnong.
