Iap 35 ngut ki briew, jah rngai 11, mynsaw 22 ngut
Shillong, Jylliew 28: Ka Tnad Disaster Management ka Jylla kala ai jingkhein ba haduh 970 tylli ki Shnong bad palat 6.36 lak ngut ki Nongshongshnong ka Jylla, kila shah ktah ha u ‘Lapbah ba wan lynshop ia ka Jylla naduh ka 1 tarik Iaiong haduh mynta, uba la wanrah ia ki jingshlei um bad jingtwa khyndew ha kylleng ka Jylla.
Ka tnad ka pyntip ruh ba haduh 11 tylli ki District ka Jylla lait noh ka District thymmai ka Eastern West Khasi Hills, ki dei kiba la shah ktah ha kine ki jingjia shlei um bad ki jingtwa khyndew, kiba la shim ruh haduh 35 ngut ki mynsiem briew, pynjah rngai haduh 11 ngut bad pynmynsaw ia 22 ngut.
Haduh 21 ngut ki briew la ioh ban pyllait na ki jingma ha ka jingshlei um bad twa khyndew bad haduh 4885 ngut la ioh ban pynsah ha ki 31 tylli ki jaka sah ba shipor jong ka sorkar (relief camp) kiba don ha kylleng ki jaka.
Ka Tnad ka pyntip ruh ba haduh 4385 tylli ki Iing kila shah pynjulor ha kane ka jingwan u lapbah ba kynthup ia 265 kiba la jot pura, 3870 kiba jot mar shiteng bad 98 tylli kiba la jubor eh ka jingjulor. Ki mrad kiba la iap ha kane ka jingwan lynshop ka mariang kala kot ia ka 310 tylli.
Ka jingpynjulor ia ki jingthung jingtep kala kot haduh 1010.81 hectare nalor ki jingtei bapher bapher ba kynthup ia ki surok, ki iing, ki skul, ki dukan, ki jingkieng bad kiwei kiwei.
Ki kynhun ai jingiarap (rescue team) kiba la mih ban leit iarap ia ki briew ba shem lanot ki kynthup ia kawei ka kynhun jong ka SDRF kiba la phah sha South Garo Hills, ki shipai Air Force, BSF, Navy, ki Pulit ka Jylla lem bad ki Ophisar jong ki tnad bapher bapher kynthup ki BDO, ki Engineer ka PWD bad kiwei kiwei.
