Shillong, Jylliew 28: Ka Sorkar Jylla kala ai ka jingmynjur ba kan pyllait noh ia ka song pisa ba T.2 klur manla ka lai bnai sha ka Mawmluh Cherra Cement Limited (MCCL) ba kan siew khuid noh ia baroh ka tulop ba sahteng jong ki Nongtrei.
Ia kane la pyntip da u Chairman ka MCCL ma Wailadmiki Shylla uba la iathuh ba ka sorkar kala shim ia kane ka rai hadien ka jingialang ba long hapdeng u Myntri Rangbah bad ki bor pyniaid ka MCCL.
Kane ka rai jong ka Sorkar kala mih ruh hadien ka jingbyrngem jong ki Nongtrei ka MCCL kiba don hapoh ka shatri jong ka Mawmluh Cherra Cements Employees’ Union (MCCEU) ban iakhih lada ka Sorkar kam lah ban pyllait noh ia ka tulop jong ki hapoh ka shitaiew.
Haba iakren bad ki nongthoh khubor, u ma Wailadmiki ula ong “Ha ka jingialang, u Myntri Rangbah ula pynbna baka Sorkar kan pyllait T. 2 klur manla ka lai bnai kum ka jingiarap song pisa bad ruh ban siew ia ka tulop jong baroh ki Nongtrei ka MCCL”.
U ma Wailadmiki ula iathuh ba ha ka taiew bala lah, ki Nongtrei ka MCCL kila wan iakynduh ia ki borkhmih ba iadei bad ka tulop bad ki kwah ia ka jingkular naka Sorkar Jylla haba phai sha ka jingiarap song pisa.
“Ka Sorkar kala mynjur ban pyllait T. 2 klur man ka lai bnai bad kane ka song kan iai bteng tad haduh bala dep pynbeit lut ia ki kam baroh hapoh ka MCCL” ula ong.
Haba kylli halor ka jingiaid ka kam ba iadei bad ka Joint Venture, u Chairman ka MCCL ula ong ba ka Sorkar kala buh ia ka 18 tarik Naitung kum ka sngi ba khatduh ia ki artylli ki kompani ba kin batai ia ki plan haba iadei bad ka Joint Venture jong ka MCCL.
“Ngi la khot ia kine ki artylli ki kompani kiba la wan shakhmat ban trei ia ka Joint Centre, ba kin ai ia ka jingbatai ba khatduh ha ka 18 tarik la kin iaid shakhmat ne em bad kane ka Joint Venture” ula bynrap.
