SHILLONG, JYLLIEW 28: Ka Ri Bhoi Youth Federation hynne ka 28 tarik u Jylliew, kala leit noh synniang T.1 Lak sha ka seng Khasi Students Union halor ka jingthmu ka jongka ban phah ia ki samla Khasi sha Delhi ban leit iaka Caoching Class na ka bynta ban ialeh iaka eksam Civil Service.
Ia katei ka pisa T.1 Lak la aiti da u President ka RBYF u Bah BP Thangkhiew ha ka kti jong u President ka KSU u samla Lambokstarwell Marngar ha ka jingdonlang ki nongialam jong kine ki ar tylli ki sengbhalang ka jylla.
U Bah Thangkhiew u la ong, ka jingai jingiarap ka dei kaba la lum na baroh ki dkhot jong ka RBYF bad ka long kaba rit, namar ka KSU kan hap ban pynlut bun ban phah ia ki samla Khasi ban leit iaka Coaching Class naka bynta ban ialeh iaka eksam Civil Service jong ka UPSC khnang ba ynda ki pass kin long kum ki IAS, IPS ne IFS bad kin kylla long ruh kum ki atiar jong ka jaidbynriew khamtam haba ka jylla khatduh eh kala ioh iaka IAS ophisar ha u snem 2013.
U la ong, kane ka jingiarap kadei ka jingkyrshan jong ka seng iaka KSU khnang ba kan lah ban pyniaid shakhmat iaka jingthmu ba bha jong ka bad u la kyntu ruh ia kiwei pat ba kin ailem ia ka jingkyrshan bad jingiarap iaka KSU ba kan lah ban bteng ia kane ka kam man la u snem.
U samla Lambokstarwell u la pynpaw ka jingsngewnguh ia ka RBYF kaba la kloi ban ai jingiarap ia ka seng bad u la ong ka sengkan long tang ka nongprat lynti ban phah ia ki samla ka jaidbynriew ban pyntbitbad ban pynkhreh bha ialade ban iakhun iaka eksam Civil Service bad ynda kitei ki samla ki pass, ka seng kan ym shim ia ka burom sha lade hynrei ka burom kan leit sha ka iing ka sem bad aiak jaidbynriew hi baroh kawei.
U la pynpaw iaka jingsngewtynnad ia ka jngwan ai jingkyrshan bad jingiarap jong ki katto katne ki riewshimet kaba la lah ia ka seng ba kan pyniaid shakhmat iaka jngthmu ka jongka.
