Shillong Nailur 12: U Myntri ka sorkar jylla uba khmih iaka tnad Excise Bah Kyrmen Shylla hynne ka Lah Sngi u Blei, u la iathuh ba ka jingiohlum khajna ka tnad kala kiew bha hadien ba kala don ka jinghiar jong ki nongdie kyiad be-aiñ ha kine ki 4 snem kiba la leit.
U Bah Shylla ula pyntip ba ka tnad kala sakhi ia ka jingkiew haka jingioh lum khajna naduh u 2018-19 haba kala ioh T.226.21 klur, hadien kane T.276.27 Klur ha u 2019-20, T.375.38 Klur ha u 2020-21, T.307.99 Klur ha 2021-22 haba ianujor bad ki snem kiba la leit.
“Ka jingioh lum khajna ha u 2022-23 haduh u Nailar ka long T.137 Klur bad ngi khmih lynti ba kan kynjoh sha ka T.300 Klur haduh T.350 Klur” ong u Bah Shylla haba jubaba iaka jingkylli kaba la wanrah da u MLA ka Rangsakona u Zenith Sangma halor ki daw jong ka jingkiew 33% ka jingdon ki dukan die kyiad kata na ka 611 tylli ha u 2018 sha ka 812 tylli ha u 2022.
“Kane kadei namar ka jinglap ia ki nongdie bad nongkhaii kyiad be-ain, kaba ka pynlong ia ka tnad ban kiew haka jingiohlum khajna” ong u Bah Kyrmen.
U la ong, haba ka don ka jingjur jong ki nongdie kyiad be-ain, ka tnad ka ioh ban lum khajna tang kumba T.162.66 Klur ha u 2013-14, T.155.13 Klur ha u 2014-15, T.170.03 Klur ha u 2015-16, T.168.98 Klur ha u 2016-17 bad T.199.30 Klur ha u 2017-18.
U Myntri Sorkar u la iathuh ba hashwa u snem 2018, ka jylla kala sakhi iaka jinglap iaki jingjia jong ka jingdie tuh iaka kyiad, kumba 1092 tylli ki jingjia la lap ha u snem 2016-17, 1460 tylli ha u 2017-18 bad 1014 ha u 2018-19, hynrei kitei ki jingjia kila nang hiar sha ka 807 ha u 2019-20, 291 ha u 2020-21 bad 233 ha u 2021-22.
Namar ka jingbym hun iaka jubab jong u Myntri Sorkar, u Zenith Sangma u la ong, kala don ka jingkiew haka jingdie be-ain iaka kyiad la kadei ha Tura ne Shillong ha kine ki ar snem kiba la dep.
U la ai nuksa, ba ha ka lynti ban leit sha ka iingsah ka jongu, u lah ban iohi ba ki don bun ngut ki kynthei kiba ieng harud surok kiba buh iaka kyiad ha kip la bad ula kylli, balei ym shim la lah ban pynsangeh iaka jingdie kyiad be-ain hadien ba la dep ban pynkiew iaka jingdon bun tylli ki dukan die kyiad.
Une u MLA u la kynnoh ruh ba ha Tura, lah ban ioh iaka kyiad ha ki dukan kiba die kwai.
“Balei kum kane ka jingtip kam don bad ka sorkar jylla? la kylli u Zenith bad ka bynrap ba ka jingkiew jong ka jingdon ki nongdie kyiad be-ain kala ktah jur pynban ia kito kiba la ioh iaka lisen ban pyniaid ia ki dukan die kyiad.
“Kumta, kam shim la hiar hynrei kala nang kiew pynban. Balei ka sorkar ka hap ban ap ban ioh iaka jingujor? Hato ka sorkar ka matlah namar kino kino ki riewpaidbah ki tip ba ka jingdie be-ain iaka kyiad ka iaid ha man la ki jaka” ong u Zenith.
U Myntri Sorkar ula ong, ba ka tnad ka jongu, kam shim la ong, ba ka jingdie kyiad be-ain kala sangeh hynrei kila pyrshang katba lah ban pynsnageh ia katei kajingdie be-ain bad dei namarkane ba ki jingjia kila hiar naka 1000 sha ka 300-200 tylli.
“Ngi dang pyrshang ban pynsangeh shi syndon” ong u Bah Kyrmen bad ka kyntu ia ki paidbah ba kidei ban ailem ia ki jingtip halor kitei ki kam be-ain, khnang baka tnad kan ioh ban leh ia kaba donkam” ong u Myntri sorkar.
