Shillong, Nailur 12 : U Chief Executive Member ka KHADC ha ka sngi Nyngkong u la lum ia ki MDC jong ka Council ban ia kren bad iatai sani halor ka jingpynbna jong ka sorkar ia ka notification kaba iadei bad ka jingpyntreikam ia ka CrPC bad CPC ha ka jylla.
Haba kren bad ki lad pathai khubor u CEM, bah Titos W Chyne u la ong ba ka nongrim treikam jong ka Council ka skhem ban pyrshah beit ia katei ka notification jong ka sorkar. “Kumba ngi la dep pynpaw ba kane kan ktah jur ia ka bor jong ki District Council Court kynthup ia ki kashari ha ki shnong bad ki Hima lane ki Subordinate bad Additional Subordinate Court bad ruh ki village court”, u la ong.
U iathuh ruh ba ki la rai da kawei ka sur ban leit kynduh biang sa shisien pat ia u Myntri Rangbah haba iadei bad katei ka Ishu.
U CEM u ong ruh ba ki MDC baroh kin leit ruh ban kynduh ia u Lat ka jylla u Satya Pal Malik namar kane ka kam ka takhuh bad ka riti synshar jong ka ri India namar kane ruh kadei ka bor ba ka ai ha ki katkum ka Khyrnit kaba Hynriew.
Kawei pat ka mat ba ki shim ha katei ka sngi ka long ba ka Council kan sa khot ia baroh ki nongialam shnong bad Hima kiba don ia ka bor ban bishar sha ka jingialang kaban long ha ka taiew ban wan.
