Tura, Jylliew 21: Ka jingiap ki briew na ka jingshlei um ba lynshop ia ka Ri-lum Garo ha ka 17 tarik Jylliew kala kiew sha ka 6 ngut da ka jingiohtam sa 2 tylli ki metiap na Rongsa Awe ha South Garo Hills.
Kine ki metiap ki dei jong ki nongrep ba kynthup ia u Sengman D Sangma ba dang 20 snem bad u Reppilson D Sangma ba 33 snem. Ia kine ki metiap la lap na artylli ki jaka ha ka thain.
Ia ka metiap i Sengman la ioh tam na ka wah Rongsa Awe ba don ha Nangalbibra ha ka janmiet sngi thohdieng katba ia ka metiap u Reppilson la lap ha ka miet sngi U Blei na ka wahduid ha Dajugittim, kaba don kham sharum. Kine baroh arngut ki dei na ka thain Dokongsi jong ka Kharkutta, North Garo Hills.
Ki arngut ki paralok jong kine ki briew pat haduh mynta ym pat shym la lapdien naduh ba ki shah rong ha ka umsaw katba ki dang iohthiah ha ka sem ba don harud ka wah. Kine kiba dang jah rngai ki kyrteng u Nilbash B Momin ba 21 snem bad u Griksing B Momin ba 18 snem, kiba dei hi na ka Shnong Dokongsi, North Garo Hills.
Kine ki 4 ngut ki dei ki nongtrei ha kawei ka jaka thung diengjri ha Rongsa Awe bad kila iasah lang ha ka sem ba rit marjan ka wah. Ka umsaw kala rat ia kane ka sem bad rong ia baroh 4 ngut.
Ki briew kiba la iap naduh ka jingshlei um ha ka 17 tarik Jylliew ha South Garo Hills kala kot ia ka 6 ngut nalor ki lai ngut ki shikurim bad i Khun kiba iap ha Baghmara bad kawei ka kynthei kaba kaba iap ha Siju hadien ka jingshah btep im ha ka khyndew.
Shitaiew shuwa kane, saw ngut ki briew kynthup ia lai ngut ki Khynnah, kila duh noh iala ka jingim ha ka jingtwa khyndew ha ki thain West Garo Hills bad Betasing Block kaba hap ha South West Garo Hills.
