Shillong, Nailar 3: Ka Meghalaya High Court kala bthah ia ka Sorkar Jylla ban aiti ia ka Affidavit kaba pura hapoh ka 3 taiew halor ki sienjam bala shim ban iakhun pyrshah ia ka jingkhaii droks, kynthup ia ki projek kiba dang iaid shakhmat bad ki prokram ka sorkar.
Ka iingkashari hapoh ka jingialam ka Chief Justice ka Revati Mohite Dere bad u Justice W Diengdoh kila pynmih ia ka hukum ha ka sngi Nyngkong, haba tian bishar ia ka PIL, MC(PIL) No. 7 jong u 2025 ba la mudui da u Bah Mewaker Lyngdoh.
U Additional Advocate General K Khan ula pan por ban aiti ia ki rekod baroh halor ki sienjam kiba la shim da ki bor kiba dei khmih.
Ka iingbishar kala mynjur ban ai ia ka por bad bthah ia ka Jylla ban aiti ia ki kot ki sla sha u nongiasaid aiñ u SP Mahanta uba mihkhmat ia u nongmudui.
Ka iingbishar kala ai jingbit ruh ia u Mahanta ban ai ia ka Affidavit ba kdew ia ki jaka kaba duna ka rukom treikam jong ki pulit, ban iarap ia ki bor kiba dei khmih ban shim ia ki sienjam kiba kongsan.
Ia kane ka mukotduma yn shong bishar biang ha ka 1 tarik u Nailur 2026.
