Guwahati, Jylliew 21 : Ia u Slasha Pabhojan Gold Tea, u ba dei u jait slasha u ba kham pher ba la pynmih napoh Golaghat district ka Assam hynne ka sngi la lah ban die ha ka dor T. 99,999 shi kilo ha ka iew die lilam (auction) ba kyrpang ba la pynlong ha Jorhat shi bynta ban rakhe ia ka “International Tea Day.” Kane ka dei ka dor ka ba heh tam ba la lah ban sakhi ha kane ka iew.
Na ka liang u heh ka Jorhat Tea Auction Centre (JTAC) u la ong ba ia une u slasha la thied da ka Esah Tea, ka ba dei ka karkhana ka ba pynmih ia u slasha D2C Tea Brand napoh Assam.
U Bijit Sarma, Founder, CEO, Esah Tea u la ong ba ki sngewkmen shibun ban ioh ia ka jingjop ha kane ka iew ka ban iarap ruh ia ki ban ai sha ki paidbah nong pyndonkam ia u slasha u ba bang bad u ba paka tam napoh Assam.
U la ong ruh ba une u jait slasha u dei u ba kham pher shibun bad ia kane phin sngewthuh tad lada phi la ioh ban mad. U la ong ruh ba ki paidbah ki ba pyndonkam ki la don ha kylleng ka pyrthei bad ki sngewthuh ia ka jingmad bad ia ka dor jong u.
Kumjuh na ka liang ka Rakhi Dutta Saikia, ka ba khmih na ka bynta ka jingpyniaid iew ia ka Pabhojan Organic Tea Estate, ka la ong ba ki la pynmih ia une u slasha na ki shylluid ba kyrpad jong ki sla ha ka ba ki la lah ban pynmih tang shi kilo.
Ka la pynpaw ruh ka jingkmen halor kane ka rekod ka ba heh tam ha ka jinglah ban pyniaid iew ia une u slasha ha ka sien ka ba nyngkong, kata hadien ba ki la pynmih ia u da ka ba pynshong nongrim halor ka jingjur ka jingdawa na ki kynhun bapher bapher. Shuh shuh ka la ong ruh ba kane ka jinglah dor kan iarap shibun ha ka ban kyntiew ia ki karkhana pynmih slasha na Assam.
