spot_img

Kiew ka jingdkhat jingim ki briew ha Assam, kdew ki riew shemphang ia ka ‘jingjur ka jingkhuslai’

Date:

Share post:

Guwahati, Naitung18: Ka jingdon jong ki briew ki ba pynkut noh ia la ka jingim ka la nangkiew sted ha ka jylla Assam, bad ha ba bishar naduh kine ki shiphew snem ba la dep kane ka la wanrah ka jingsngewkhia ka ba jur ha ka ba bun na ki ba kum kine ki jingjia ki dei ki ba la jia ha ka nongbah Guwahati.

Ia ka daw sha lyndet halor kane la pyniasoh bad ka jingban khia, ki jingkhuslai ne depression.

Katkum ka rekod na ki pulit, ha ka snem 2018, ka Assam ka la sakhi haduh 2,310 tylli ki jingjia jong ka jingiap na ka ba leh hi (suicide).Ka jingkhein ba la ioh lum da ka National Crime Records Bureau (NCRB) ka pyni ba ki la don haduh 2,370 ngut ki briew ki ba la pynkut noh ia la ka jingim ha kane ka jylla (Assam) ha ka snem 2019, kata ka jingkiew ka ba haduh 36.8% sha ka 3,243 ha ka snem 2020.

Katba ka NCRB kan dang pyllait ia ka kaiphot na ka bynta u snem 2021, hynrei ka jingioh lum jingkhein da ka tnat pulit ka Asssam na ka bynta u snem ba la dep ka long haduh 3,302 ki ba pynkut ia la ka jingim, ha ka ba 2,391 ki dei ki shynrang bad 911 ki kynthei.

Ha ka jingjia ba dang shen uwei u dkhot ka kynhun ka ba khmih na ka bynta ka bha ka miat jong ki ksew surok 32 snem rta napoh Dibrugarh u la pynkut noh ia la ka jingim hapoh ka iingsah jong u ha Dibrugarh ha ka thain shatei ka Assam ha ka 7tarik mynta u bnai.

Ka sorbah ba heh tam ka jylla, ka Guwahati ka la sakhi ia ka jingdon bun eh ki ba pynkut ia la ka jingim, kata na ka 222 ki ba kum kine ki jingiap ha ka snem 2013 sha ka 414 ha kane ka snem ba la dep.Mynta u snem ki la don lypa palat 400 ngut ki ba pynkut ia la ka jingim, kata tang ha kine ki hynriew bnai ba la dep.

“Kane ka jingkiew ha ka jingdon jong ki briew ki ba pynkut noh ia la ka jong ka jingim ka la wanrah ka jingsngewkhia ka ba jur.Ngin hap ban shim ia ki lad ki lynti ban pynduna halor ki ba kum kine ki jingiap namar ki katto katne ki daw bad ka jingshah ktah ha ka bor pyrkhat pyrdain ki ju pynshlur ia ki briew ba kin pynkut noh ia la ka jong ka jingim,” ong u joint police commissioner ka Guwahati, u Partha Sarathi Mahanta ha ka taiew ba la dep.

Khnang ban pynioh ia ka jingiasyllok na ka bynta kito ki briew ki ba shah ktah ha ka bor pyrkhat pyrdain, na ka liang ki pulit ka sorbah Guwahati ki la sdang ruh ban phone ia ki artylli ki nombor ban aijingiarap (6026900574 bad 6026900552) ha ka ba ki briew ki lah ban ioh ia ki lad jingiarap bad ki jingai jingmut na ki riew shemphang.

Na ka liang ki riew shemphang ki sngew ba ki don shibun bah ki daw ki ba la kyntiew halor ka jingdon jong ki briew ki ba pynkut noh ia la ka jingim ha ka jylla Assam bad kumjuh ha kiwei pat ki bynta jong ka ri naduh kine ki snem ba la dep, bad lah ban pynduna ia kane tang lyngba ka jingpynioh ia ka jingiasyllok ka ba biang.

Share post:

spot_img
spot_img

Popular

More like this
Related

Plie ka MIDC ia ka Business Facilitation Centre ban pynsuk ia ka jingsengjam ha Jylla

Shillong Jylliew 19: Ka Meghalaya Industrial Development Corporation Ltd....

Pyniaid ki Crorepati ia ka Sorkar Arunachal Pradesh bad Sikkim

Guwahati, Jylliew 19: Kaei kaba ka Jylla Arunachal Pradesh...

Pynkup burom ka MEPA ia 2 ngut ki Journalist ba ioh khusnam na Meghalaya

SHILLONG, JUNE 19: Ka Meghalaya Editors’ and Publishers’ Association...

Aibor ka Sorkar ha ki DC ban rai ia ka Roster System ha ki District

Shillong, Jylliew 19 : Ka Kynhun Myntri ka Sorkar...
spot_img