Shillong, Naitung 18: Ka Shillong Cantonment Board (SCB) hynne ka sngi, kala kyndang ia baroh ki Longiing kiba shong ba-ain ha ka jaka jong ka Board, kaba don ha ha ïew Them Mawbah pyrshah ia ka Kart Building, Shillong.
Kumba 30 haduh 35 tylli ki Iing bad 10 tylli ki dukan ha Kat Godown, Them Mawbah kila shah kyndang bad shah jyndat naduh thymmei da ki kor JCB.
Kane ka jingkyndang ia kine ki Nongshong be-ain kala jia hynne ka step por 10 baje eiei, hapdeng ka jingpyrshah kaba jur jong kine ki briew. Ki Magistrate bad ki Pulit kila iadonlang ha kane ka jaka ban peit ba kane ka jingkyndang ia kine ki Iing be-ain kan ym wanrah ia ka jingthut ia ka shongsuk shongsain.
Kine ki Longiing kila kynnoh baka Shillong Cantonment Board (SCB) ki khlem ai jingpyntip (notice) eiei ruh em sha ki ha ba kynoh ba kane ka sienjam bala shim da ka Board ka dei ka jingpynkhein ia ka hok longbriew man briew.
“Ngi sngewthuh ba ka jaka ka lah ban dei jong ka Sorkar lane ka jaka ka don hapdeng ka jingiakajia hynrei kum ka jingiatip lem para briew, ka Board kala dei ban aipor ia ngi ban pynkynriah ia baroh ki jingdon jingem” kila ong.
Kila kynnoh ruh ba ki Bor District bad ki Pulit kila shu long ki nongpeit kai bad kim shym la sngap ia ki jingkyrpad bad ki jingud jingnam pynban kila pyndonkam ia ka bor ban sei ia ki jingdon jingem hashuwa ba kin pynpra ia ki dukan bad ki Iingshongwai.
