Nongstoiñ, Risaw 24: Ka seng trei mon sngewbha kaba la tip kum ka Nongstoiñ Social Service Society da ka Facilitating Agricultural Regeneration Measures Project, kaba la kyrshan da ka MISEREOR na Ri Germany bad ka Caritas India, myn ha ka sngi saitjaiñ jong ka taïew ka la pynlong ïa ka ïew ïadielang ki nongrep ban pyni paidbah ïa ki jingthung jingtep jong ki ïa kaba la tip kum ka ‘Indigenous Vegetable Market for Promoting Local Marketing Network for the Rural Farmers’.
Katei ka jingïalang ka long ruh kum shi bynta ban kyntiew ïa ka rep ka riang jong ki nongrep, kiba la thung ïa ki jingthung khlem da pyndonkam ïa ki dawai dashin kaba ngi ong ka rep tynrai ne ka Organic Vegetables ha ka ktien nongwei, ha kaba la ïohi ruh ba ki nongrep na ki shnong bapher bapher jong ka thaiñ Southwest Khasi Hills District bad West Khasi Hills District ki la wanrah ban die ïa ki jhur ki jhep, ki soh ki pai kiba bun jaid ha katei ka sngi.
Ha katei ka jingïalang u samla Mickey M. Marweiñ M.A. LLB. Secretary ka seng National People’s Youth Front (State Level), ha kajuh ka por u ba bat ruh kum u working president ka National People’s Youth Front Nongstoiñ, u la long kum u kongsan bad la synranlang ruh da I kong Philakyntiew Nongkynrih, DDM, NABARD, West Khasi Hills, South West Khasi Hills bad Eastern West Khasi Hills District kum I symbud kongsan, kumjuh ruh I kong Memorial Khongkai, SDO,MSSDS, West Khasi Hills District, bad u phadar James Anderson Syiemlieh, Director ka Nongstoiñ Social Service Society, NSSS.
Ha katei ka sngi ka kynhun ka la ïoh ruh ban sam ïa ki syrnod sha ki katto katne ngut ki nongrep kiba la trei shitom ha ki kam rep bad kiba la kham paw ha ki kam lyngba ka jingïoh jinghikai na katei ka NSSS.
Ym tang katta, ha katei ka jingïalang katei ka kynhun ka la ïoh ruh ban ai sngewbha ïa ki katto katne tylli ki tiar pyndonkam aha ki nongrep kaba kynthup ïa ki mashin shet jingbam, ki kor tylliat umsoh bad kiwei kiwei bad la pynlong ïa katei ka jingïalang ha phyllaw jong ka skul St. Xavier’s Secondary School, Nonbah, New Nongstoiñ.
U kongsan haba ai jingkren ha katei ka sngi u la ong, “Ka long kaei kaei kaba sngew tynnad ban ïoh sngew ba kane ka seng trei mon sngewbha ka pyrshang ban kyntiew ïa kum kane ka kam jong ki nongrep, kaba dei kawei na kiba kongsan tam ïa u briew namar ha kine ki sngi lah bun satang ki jhur ki jhep ne ki soh ki pai kiba la pyndonkam dawai lut.
“Kane ka ktah shibun ïa ka koit ka khiah hynrei lada kane ka kam thung jingthung ne ka kam rep tynrai kan nang kham san kham kiew ha ki por ki ban sa wan, kan long shisha ka jingmyntoi bah ïa u khun bynriew ba un lait na ki jingpang bapher bapher” ula ong.
