Shillong, Risaw 31 : U Myntri Rangbah ka Jylla Conrad K Sangma ula pynksan ia ka rai jong ka Sorkar Jylla ban pynlong ia ki tamasa kynthup ia ka Shillong Cherry Blossom festival da kaba ong ba ki pyniohnong bha na kaei kaba la kynshew.
Ula iathuh ba ka Sorkar Jylla kala ioh ban lum haduh T.130 klur tam na ka jingkynshew ba T.20 klur ha ba pynlong ia ki tamasa bapher bapher jong u snem bala lah, kaba pyni ia ka jingmyntoi kaba khraw ha ka ioh ka kot na ki tamasa.
“…kumba T.20 klur tam ne duna ngi la pynlut ha ki tamasa u snem bala lah bad ngi la iohnong jan T. 130 klur tam…kine ki dei ki jingkhein kiba shai kiba pyni ba ki concert bad tamasa ki dei kiba iohnong bha bad kila pynshisah ba ki lah ban aikam bad pynshisha ruh ba ki la rah ia ka nam jong ka Jylla” ong u Conrad haba iakren bad ki nongthoh khubor ha ka sngi Thohdieng.
Haba kren halor ki jingkynthoh ba ka Sorkar kala shimkhia palat ia ki tamasa ban ia kiwei ki tnad, u Conrad ula ong “haba ngi phai sha ki kam pynroi, ngi hap ban khmih ia kiei kiei baroh kiba iadei bad ka roi ka par…ngi mang ia ka pisa ha man ki tnad bapher bapher bad leh ruh ia ki kam bapher bapher”.
Ula kren ruh ia ka jingkynshew ka Sorkar ha ki tnad bapher bapher kynthup ia ka pule dangle, ka koit ka khiah bad ki jingtei.
“Ka Pule Puthi ka ioh T. 3500 klur na mang tyngka joong ngi….ngi buh pisa ha manla ki tnad namar man la ki tnad ki hap ban kiew” ong u CM.
Ula ban jur ba ki tamasa kum ka Cherry Blossom kala noh synniang shi katdei eh ban pynpaw nam ia ka Shillong kum ka jaka wankai ki nongjngohkai.
“Mynta, ka Shillong ka dei kawei na ki jaka bala iawad jingtip bha da ki briew ba kwah wankai….Namar ki tamasa bad ki prokram kum kine” bynrap shuh shuh u Conrad.
