Boko, Risaw 31: Ka Rabha Hasong Sixth Schedule Demand Committee kala pynkhreh ban pynlong ia ka tri-annual conference ba 7th ha u 29 bad 30 tarik bnai Nohprah, 2025 ha ka shnong Satpara kaba hap hapoh ka Boko-Chaygaon constituency jong ka Kamrup district.
Ha kane ka jingialang yn shim ia ka rai ha kaba iadei bad ka bynta jong ka imlang sahlang ha ka election sha ka iing dorbar thawain jong ka Assam ha u snem 2026.
Haba pynkhreh ia ka jingsdang jong kane ka jingialang, la pynlong ia ka jingthep vote (Laikhuta Sthapon) ia kaba la pynlong ha ka sngi Thohdieng ha madan Satpara ia kaba la pynlong lang da ka Rabha Hasong Sixth Schedule Demand Committee, ka All Rabha Students’ Union (ARSU), ka Rabha Mahila Parishad bad kiwei kiwei de ki kynhun kiba ia snohkti lang.
Ia ka lama la pynher da u Sonaram Rabha uba dei u chief executive member jong ka Rabha Hasong Autonomous Council.
Haba kren ha kane ka jingialang u President ka ARSU u Motilal Rabha u la kyrpad ia baroh ki jaitbynriew kiba don ha kane ka dong ka thain ba kin ai ka kti kamon ka kti kadiang bad ruh ban ialam lynti ban pyntikna ïa ka jingjop jong ka dorbar ban wan.
Shuh shuh u la ong, ïa ka jingdawa ba la slem bha ban pynrung ïa ka Rabha Hasong Autonomous Council hapoh ka Khyrnit ba Phra jong ka Riti Synshar ka ri India yn sa pynpaw biang da kaba tyngeh hakhmat u Myntri Rangbah ka Assam u Himanta Biswa Sarma ha kane ka jingïalang.
Ki seng jong ki Rabha kin sa iatai bad iathir ia ki lad ki lynti ban dang pynkhlain ia ka jingiakhih kada ia ka jingdawa jong ki ym lah ban pynurlong.
U President ka Sixth Schedule Demand Committee u Dashanan Rabha u la pynkynmaw ba ia kane ka committee la thaw bad seng ha u snem 2003 bad ka la iai pynkhih khlem sangeh naduh katei ka por.
Haba pynmih ia ka jingmaham kaba tyngeh, u la pynbna ba lymda ai ïa ka Rabha Hasong Autonomous Council ka jingïada jong ka riti synshar ka ri katkum ka Sixth Schedule, ki kynhun kin hap ban shim ïa ka rai ha ka elekshon sha ka Ïingdorbar Thawaiñ jong u snem 2026.
U la ban jur ba baroh ki kynhun Rabha bad ki seng kiba ïatreilang kin ïawan lang ban thaw ïa ka buit treikam kaba ïatylli halor kane ka kam.
Ha kane ka jingthep vote (symbolic poll) (Laikhuta Sthapon) la wan ban ia don lang da ki dkhot jong ka Rabha Hasong Autonomous Council, kiba kynthup ïa u Arjun Chetry, u Ramakanta Rabha, u Aditya Rabha, ryngkat u working president ka ARSU u Pradip Rabha bad katto katne ngut ki nongïalam bad ki nongshong shnong ka thaiñ.
