Shillong, Nailur 08: U Myntri barim ka Sorkar bad MLA ka BJP Bah A.L.Hek ula ong ba ki paid Nongthep Vote jong ka Pynursla Constituency kin sa ai ka jubab pyrshah ia u Vice President ka NPP bad Symbud Myntri Rangbah Bah Prestone Tynsong ha ka elekshon MLA-2023.
Une u Nongialam ka BJP ula kynthoh ia kane halor ka jingkren ba dang shen jong u Bah Prestone ha kawei ka jingialang ha Mawlai ha kaba ula ong “Ngi ki MLA kynthup ki kyrtong iakhun Elekshon, ngi ju pynbiej laiphew jait ia ki bapli ki Nongthep Vote bad ki Nongthep Vote ruh ki ngop beit. Kane ka dei ka jingeh, Ngi pynbiej ia ki man ka san snem bad ki ruh ki ngop man ka san snem”.
U Bah Hek ula ong “Kane ka dei ka jingkyrsiew thiah ia ki Nongkyrshan u Bah Prestone bad ki Nongthep Vote lada kila shah pynbiej ha baroh kine ki 20 snem”.
U Bah Hek ula ong ba u Bah Prestone ula shu pynbiej ia ki paidbah jong ka Constituency jong u bad ki paidbah ruh kin sa ai ia ka jubab ha ka elekshon 2023.
Haba pynrem ia kum kine ki rukom kren da u Nongialam seng sain pyrthei, u Bah Hek u sngew ba kum u Nongialam u dei ban pyni ne kren kum u Nongialam.
