Shillong, Nailur 08 : U MLA ka BJP Bah A.L.Hek u ban aireng pyrshah iala u Pyrsa kum u kyrtong ka NPP ha ka elekshon MLA-2023, ula pynpaw ba kam don satia kano kano ka jingsngewpher bad ka elekshon kan long hi kumba ju long ha ki snem bala lah.
U MDC ka Congress na Mawkhar-Pynthorumkhrah Bah Pynshngain N Syiem ruh u dei uwei na ki kyrtong ban mih iakhun ha kane ka elekshon MLA ban wan na Pynthorumkhrah Constituency.
U Bah Hek uba dei ruh u Myntri Sorkar barim ka Jylla ula ong ba ki jingialeh hi ka don beit ha manla ka elekshon bad kumba long ha ki snem bala lah, kin don bun ngut ki kyrtong ki ban ia aireng, kumjuh ruh kan long ha kane ka kynti.
Haba kylli la u sngewhun ia ka rukom treikam lajong, u Bah Hek ula pynpaw ba ula trei khlem shongthait na ka bynta ki paidbah ka Constituency haba ong ba ki paid nongthep vote kin dei ki nongbishar kiba biang tam ban pynpaw ba kumno u ai ka jingshakri.
