Shillong, Nailur 08 : Ka East Jaintia National Council (EJNC) hynne ka sngi Palei ka la kynnoh ba ka sorkar jylla ka la leh meinah haba phai sha ka jingai ia ki kam pynroi ha Rilum Jaintia.
Haba kren bad ki lad pathai khubor u president ka EJNC u Bah Sambormi Lyngdoh u la ong ba naduh 2018 ka sorkar jylla ka khlem ai satia kino kino ki kam pynroi ia ka Rilum Jaintia khamtam eh ia ka East Jaintia Hills District la ka dei ha ka pule puthi ne ha ki lynti syngkien.
“Naduh u snem 2018 ka surok kaba dei ban iaid lyngba ki shnong kiba bun kynthup naduh ka Semmasi, Pala, Mukngor, Kseh kiba pyniasoh bad ka Saipung, Sutnga bad Elaka Nongkhlieh kim shym la don kano kano ka jingmaramot lane wat ban siang surok rong,” ong u President.
Haba phai sha ka pule puthi, ula kynnoh ba wat ka Residential School kaba don ha Jalaphet bad Umtyra, kaba la mang pisa bad tei naduh ka sorkar ba la dep, kane ka sorkar ka khlem pat lah ban pyntreikam haduh mynta.
U la iathuh ruh ba ka distrik ka don tang kawei ka Training Centre ia ki Nonghikai ha Umtyra bad mynta katei ka jaka pyntbit ka shong thylli haduh mynta namar ba ka sorkar kam pat mang pisa ba kan treikam noh.
“Ka jingbym treikam bun ki projek kam pynroi ka kdew ba ka don ka jingshah Liang ha ka jingmang tyngka da kane ka sorkar ba mynta khamtam eh na bynta ka East Jaintia Hills la ka long ha ki jaka pule puthi bad ruh ha ki lynti syngkien,” ula ong.
U Bah Sambormi u la ong ruh ba ka EJNC ka la phah bun bha ki dorkhas sha ka sorkar halor ki kam pynroi hynrei haduh mynta ym pat paw dak ei ei ba kan pyntreikam ia ki mat bala kdew ha kane kine ki dorkhas.
