Shillong, Risaw 09 : U Nongialam ka Liang Pyrshah Dr Mukul Sangma ha ka sngi Palei ula ther tyngeh ia ka BJP haba kynnoh ba ka leh ia ka politic ai markylliang ban tan ia ki 8 ngut ki MLA ka UDP da ka jingkular thok hashuwa jong ka elekshon MLA 2028.
U Mukul ula ong ba ki jingkular ka BJP halor ka jingsdang biang ka jingtih dewiong bad kiwei ki jingdawa kim dei kiei kiei ruh hynrei tang pyniaid biang ia ki jingkular ba khlem pat pynurlong ha u snem 2018.
“Halor ka kam tih dewiong, ki ong ba kan sa sdang hapoh hynriew bnai ha u 2018. Hato kam dei ka jingshisha?. Ka jingpynbiej jong ka BJP kynthup u General Secretary ba khmih ia ka Meghalaya, kila ai ia kawei ka jingkren hadien kawei pat ha ka elekshon 2018 la kum ba kin leh kam phylla. Kila pynlong kam kai ia u paidbah” ong u Mukul.
“Kila kular bad ka jingbym lah ban pyntreikam iala ki kular ka dei ka jingthoh. Haba phi kular eiei bad phi khlem pyntreikam ia ka, ka mut ba ka dei kaba shu thok. Kumta ki dei ki nongthok” ula bynrap.
U ong ba ki nongphet seng mynta kila pyrshang ban pynksan ia ka jingkynthih seng da kaba pynman ia ka BJP kum ka nongpynim ia ka kam tih dewiong.
“Mynta kila pyrshang ban pynngeit ia u paidbah ba oh kila kylla long kynsan kynsan kum ki messiah ban pynsted ia ka kam tih dewiong. Nga sngewsih, kane ka dei tang ka jingpynksan ia ka kam ba kila leh namar ka jinglong lanot na ka jingshah tan. Hooid, ki dei ki lanot ba shah tan bad kila leit ym na ka bynta ka bha ka miat u paidbah, ym ban pynsted ia ka kam tih dewiong” ong u Mukul.
Haba kynnoh ba ka BJP kala pynlong atiar ia ka kyrdan ba ka bat ha Delhi, une u nongialam ka TMC ula ong “Ka BJP ka hap pynlong atiar ia ka bor jng nga, kaba mut ba ka BJP kala pynlong atiar ia ka kyrdan ha Delhi ban leh ia ki kam tan briew da kaba pynbiej ba Ngan leh ia kane, Ngan leh ia kata. Kam dei tang ia ka kam tih dewiong, kaei pat, kiwei ki ishu, ka ktien ka thylliej, balei?.
Haba khein ia ka kum ka bamsap, u Mukul ula ong “ Ka dei ka jingpynbeit ban ai mar kylliang, la ka dei lyngba ki kam, ka dei ka bamsap. Kata ka mut phi iasoh, ngin ai. Kane ka long kaba bakla. Kane ka long kaba beain bad kaba be-riti. Kane ka long kaba sniewbha ia ka lawei jong ka ri”
