Shillong, Risaw 09: U Symbud Myntri Rangbah ba khmih iaka tnat District Council Affairs (DCA) Bah Prestone Tynsong u la ong ba ka elekshon ka Garo Hills Autonomous District Council (GHADC) kan long tang hadien ba la dep ban pynbeit iaki constituency thymmai bad pynkhreh ia ka thup kyrteng nongthep vote.
Haba pynshisha ia ka jingpynjlan ia ka por treikam jong ka GHADC, u Bah Prestone u la ong ba ar tylli ki jingpynkhreh ba kongsan ki dang iaid shakhmat.
“La pynjlan ia ka elekshon GHADC tang namar ar tylli ki mat,” u la ong.
Kaba nyngkong, u la ong, ka dei ka jingpynbeit constituency thyammi. “Ngi la thaw ia ka delimitation committee bad mynta ka committe kan pynbeit thymmai iaki constituency bad kane ka kam ruh ka la jan dep” ula ong.
U Bah Prestone ula ong ba ia ka kaiphod yn sa buh hakhmat ka iing dorbar jong ka GHADC ban ioh jingmynjur bad ban phah sha u Lat ka jylla.
“Shisien ba ka delimitation committee ka la aiti ia ka kaiphod sha ka District Council, nangta ka District Council ka hap ban wanrah sha ka iing dorbar bad ka iing dorbar kan mynjur ia kane ka kaiphod pynbeit constituency thymmai bad kan sa phah sha u Lat ka jylla ban ioh ia ka jingmynjur,” u la ong.
Ka jingpynkhreh kaba ar kadei ka Special Intensive Revision (SIR).
“Ka jingpynmih paidbah kaba khatduh ia ka thup kyrteng jong ka SIR kan long ha ka 26 tarik mynta u bnai. Ia kane ka SIR yn pdiang biang da ka GHADC na ka bynta ka thup kyrteng nongthep vote,” la ong u Bah Prestone.
U la ong ba nangta ki Returning Officer ha Garo Hills kin sa pynkhreh kyrpang ia ka thup kyrteng jong ki nongthep vote na ka bynta ka elekshon GHADC.
“Halor kata kin pynkhreh ia ka thup kyrteng nongthep vote, ka thup thep vote ba kyrpang kaba hap ban leh da ki RO bapher bapher ha ka thain Garo Hills bad ki hap ban pyniakhlad ia ki nongthep vote ki bym dei ki riewlum bad ki riewlum,” u la batai.
“Kine ki dei ki ar tylli ki rukom treikam kiba donkam ban leh bad shisien ba la leh ia kata, nangta yn sa pynbeit ia ka tarik ban pynlong elekshon,” ula ong.
