Guwahati, Risaw 24: Ki pulit ka Assam kila kem noh ia phra ngut ki briew kaba kynthup ia hynriew ngut ki enjiniar jong ka Guwahati Municipal Corporation (GMC) kynthup ia u ophisar ba la shongthait ka ACS halor ka jingkynnoh bamsap lyngba ki jingpynkhuid ia ka sorbah.
Ia kane ka jingkem la pynlong da ka tnat Chief Minister’s Special Vigilance Cell ha kane ka jan miet sngi Thohdieng ba la lah.
Nalor ki heh sorkar, u director jong ka kompeni shimet kaba don bynta ha kaba shim wai ia ki kali bad ki mashin na ka bynta ka jingpynkhuid ia ki nala heh naduh ka 2 tarik u Iaiong haduh ka 26 tarik u bnai Jymmang ba la dep ruh ula shah kem noh.
Na ka liang ka Chief Minister’s Special Vigilance Cell kala rejistar case halor kane ka bynta hadien ba kala iaid shakhmat na ka bynta ban pynlong ia ka jingtohkit.
Utei u ophisar ka Assam Civil Service uba la shah kem noh u dei uba trei kum u Officer on Special Duty (OSD) hadien ba kitei ki jingkynnoh bamsap kila mih pyrshah ia u, ong ka khubor pulit.
Katei ka kompeni shimet la kynnoh ba kala phah ia ki bill kiba la kot da ki klur tyngka lyngba ki slip jingthew kiba la shu shna thok bad sei ia katei ka pisa ba la mang da ka sorkar, ong ka khubor pulit.
Katei ka kompeni la kynnoh ruh ba kala phah ia ki bill sha ka GMC kaba pyni halor ka jingpynioh ia ki kali bad ki mashin ha ka dor kaba heh.
Na ka liang ki staff jong ka GMC la kynnoh ba kila iasylla bad katei ka kompeni ha kaba kim shym la lah ban pyntrei bha ha kaba iadei bad ka jingpynkhuid ia ka sorbah katkum ki kyndon ba la buh katkum ka tender, ong shuh shuh ka khubor pulit.
