Shillong, Risaw 24: Ki bahaïng hasem jong u bah (L) Eric Bremley Lyngdoh ha ryngkat ka jingiatreilang bad ka ophis Meghalaya’s Chief Minister, ka kynhun nongtem Summersalt bad ka Meghalaya Model United Nations (MMUN) kala pynlong ka jingrakhe iaka jingdap 50 snem ka jingioh jylla ba pura ka Meghalaya.
Ha kane ka sngi kala don ruh ka jingpynkupburom ia 4 ngut dkhot ka NVDA kiba kynthup u bah A.S Mawlong, u bah Sharai Nongbri, u bah True Man Lyngdoh bad u bah Augustin Marbaniang.
Ha kane ka sngi la kynmaw ruh iaka jingdap 77 snem ka United Nations (UN) daka phang pdeng ‘Non Violence and Food Security’ bad la kynmaw ia baroh ki dkhot kiba don bynta haka Non-Violence Direct Action (NVDA) bad ia kane ka jingkynmaw burom la rakhe ha Spring Valley Farm Mawpat, East Khasi Hills.
Kumban shu pynkynmaw ka jylla mynta u snem kala rakhe iaka jingdap 50 snem hynrei kane kadei ka sien ba nyngkong eh ba la pynlong ka jingkynmaw burom iaki nongialam barim kiba la don bynta ban iakhun ban ioh ka jylla ba pura.
Lah ban pynkynmaw ba haka 10 Nailur 1968 u bah Eric Bremley Lyngdoh (Bam Kwai Dwar U Blei) ula lum ka jingialang bad ula ialam iaka kynhun Non-Violent Direct Action (NVDA) na Mawkhar ban pynlong ka jingiakhih ha Assam Secretariat ban dawa jylla pura.
Kum u General Secretary ka APHLC na Khasi Hills District bad u Chief Organizer ka NVDA, u bah Eric Bremly Lyngdoh ula thaw daka jingrwai ban kyrsiew iaki longkmie, longkpa, ki samla bad rangbah ban iamih ban dawa jylla ba pura.
Haba kren ha kane ka sngi u Director ka Arts and Culture u bah Frederick Kharkongor ula ong ba ka kynhun ba ialam da u bah Eric Bremly Lyngdoh kam dei eh ka kynhun sain hima hynrei kane ka kynhun kala ialam iaki paidbah ban iasaid naka bynta ban ioh iala ka jong ka jylla.
U bah Frederick ula ong ba ka NVDA lyngba ki nongialam bapher bapher kala thaw ki jingrwai, ki poetry bad kane ka pynlung mynsiem iaki paidbah ban don bynta ia snohkti lang bad ka kynhun u bah Eric Bremly Lyngdoh ban iakhun ban ioh jylla ba pura.
