Shillong, Jylliew: U Bah Everson Thangkhiew watla mynta u don haduh 52 snem ka rta pynban u kylla long u nongialekai ba kynsai tam jong ka Meghalaya ha ka lympung National Arm Wrestling Championship kaba long ha Hyderabad ha ka ba ula ioh ban khur haduh artylli ki takma ksiar.
Utei u rangbah ula ioh ban khur takma ksiar ha ka thup Grand Masters ha ka jingiakhun da ka kti kamon bad ruh ha ka kti ka diang bad une u ranbah u dei uba la don mynta saw ngut ki khun bad ba shong ba sah ha Nongkseh, Upper Shillong.
Ha ka sngi ba utei u rangbah u wan phai iing ryngkat bad kiwei pat ki para nongialehkai, na ka liang ka Kur bad ruh kiba haing hasem kila leit ban shaw ia u naduh jingkieng Dam ryngkat ka kynhoi ka risa tad haduh ban da poi sha Nongkseh.Ynda la poi ha katei ka jaka, ka la don ruh ka jing pynkup burom kaba kyrpang ia ute iu rangbah haka jaka kilan met jong u kaba don ha Nongkseh hi.
Na ka liang u Bah Everson ula iathuh ruh ba katei ka lynti iaid jong u ha katei ka lympung kam dei shuh kaba thymmai hynrei kaba u sngewkmen hi ka long ba mynta ka kynti ula ioh ban khur artylli ki takma ksiar hadien arsnem.
Ym tang katta, ula iathuh ruh ba ka jingjop ha katei ka lympung ka plie lad ruh ia u ban leit aireng pat mynta sha ka International Arm Wrestling Championship ka ban sa long ha Turkey.
Tad haduh mynta hi, utei u rangbah ula ioh ban khur haduh 6 tylli ki takma ha ka National Championship, kata kynthup lai tylli ki takma ksiar, kawei ka rupa bad artylli ki rnong.
Ka khubor kaba utei u rangbah u ai ka long ba rta hi kam don jingkhang haba ka mynsiem ia khun bad ka mynsiem ban poi sha ka thong ka skhem nalade hi.
