Shillong, Naiwieng 18: Ka lympung Weiking, Jaiaw, ka la shat thaba hi khriak mynta ka janmiet da ka bor jong ka bording, namar ha kine ki ar sngi ka Cultural Committee, ka Seng Khasi Kmie bad ka jingkyrshan jong ka tnat jngohkai pyrthei ka sorkar jylla, kin pynlong ia ka tamsa tamhoi “Na Thymmei Festival” kaban long ha ka 19 & 20 tarik Naiwieng 2022.
Ka jingpynkhreh ka long kaba radbah bad ka jingtrei ia ka kam ruh ka long kaba bun, naduh ban thaw ia ka rynsan kaba thymmai. Ha kine ki ar sngi, ki prokram ba la pynkhreh ka long ba sdang shwa da ka jingpyni lyngba ka sound & light show jong ka documentary flim ka Hok Ka Shi Kyntien, kaba la shna bad pynwan dur janai ia ka tynrai jingwan ban long briew u khun Hynñiewtrep Hynñiew Skum Hynñiaw Wasa sha kane ka sla jong ka pyrthei.
Ia kane ka documentary flim ba la bynrap bad ka sub title ha ka ktien phareng, yn pyni ha baroh ar sngi jong kane ka prokram ia kaba yn bynrap lang ruh bad ka jingpynlong ia kawei na ki jingiakob “Ka Lukhimai bad Nai Khatsaw Synñia” nalor ka jingpyni ia ki jingshad bad ki sur jingrwai na ki khun samla ka Seng Khasi bad Seiñ Raij Shillong (kiba ym ju da kham ioh sngew ne bna koit) kiba dang ri dang sumar kyndong ia ki da ki longdien kiba mynta.
Ka Seng ka ialap ia wer ia baroh ki nong shong shnong ba wan sha kane ka lympung ha baroh ar sngi khlem kano kano ka jingsiew bairung, ban ioh peit ban sakhi ia kaei kaba don ha lyndet jong kane ka prokram, kaban sakhi ba haduh katno ba ka jaidbynriew Hynñiewtrep Hynñiewskum ka don ia ka spah bah jong ka La Riti ba janai (culture) ban pynpaw sha khmat jong ka pyrthei.
Ka Cultural Committee ka Seng Khasi Kmie ka wer bad khot sngewbha ki para kur para kha para kher para mer ban iawan ban sakhi bad khmih ia kine ki ar sngi ki programme namar kan dei ka rneng bad ka spah lum jingtip kaba kordor kaban lah ban lum bad ban ioh rah rneng sha la iing la sem.
