Shillong, Naiwieng 21: U MLA barim ka Mawlai Bah Standling David Khongwir, ula khlad noh na kane ka pyrthei hynne ka sngi Ba-ar hapoh ka rta kaba 90 snem.
U Bah SD Khongwir ula khlad ha NEIGRIHMS hospital namar ka jingpang kaba la ban ia u la kham slem. Ia ka met jong u Bah Khongwir la wanrah ha ka Iingsah jong u ha Mawlai Nonglum mar pyrshah ka madan Weiking.
U Bah SD Khongwir u dei u MLA barim ka Mawlai constituency bad ula bat ia kane ka kam Nongmihkhmat jong ka Mawlai haduh 25 snem kynthih haduh ba un da shongthait syndon na ka kam ha u snem 1998.
U dei uwei na ki MLA ba nyngkong eh jong ka Jylla hadien ka jingioh iala ka jong ka Jylla ba pura. Ula jop ia ka elekshon ha u snem 1972 bad khlem shah rem satia tad haduh u snem 1993 haduh ba un da pynbna shongthait noh.
Ha kine ki 25 snem kum u MLA, une u Rangbah ula bat ia ka shuki Symbud Myntri Rangbah ka Jylla ha ka Sorkar kaba ialam da u (L) Darwin Diengdoh Pugh bad (L) Brington Buhai Lyngdoh, nalor ki shuki Myntri jong ki Tnad bapher bapher , Chairman ka State Planning Board bad kiwei kiwei ki kam hapoh ka Sorkar Jylla.
U Bah Khongwir u dei uwei na ki Nongialam jong ki Seng Riewlum ba kynthup ia ka HSPDP bad u Nongsaindur jong ka seng United Democratic Party (UDP).
U Bah SD Khongwir u dei u Rangbah uba la bat kum u Rangbah Shnong ka Mawlai Nonglum la kumba 55 snem, ka kam kaba la bat slem duh napdeng ki Rangbah Shnong hapoh Mawlai bad ka Ri-lum Khasi baroh kawei.
U Bah SD Khongwir ula shah jied nyngkong eh kum u Rangbah Shnong ha u Kyllalyngkot 1968 bad ula bat ia ka kam kum u President ka Mawlai Town Dorbar (MTD) haduh 35 snem naduh u snem 1988.
