Shillong, Nailar 18 : Ki Pulit ka West Garo Hills kila kem ia u Nongaibuit ka ACHIK bad Ophisar MCS barim Laben Ch Marak halor ka jingkynnoh donkti ban kynshoit ia ki paidbah kaba lam sha ka huri hura bad jinghiar thma ia ka Chief Minister Office, Tura ha ka 24 tarik Naitung, 2023.
Ia u Laben Ch Marak la kem ha ka sngi Palei. Da kane ka jingkem, ki briew ba shah kem halor kanne ka jingjia ha Tura kala kot sha ka 51 ngut.
U Laben Ch Marak u dei uwei na ki Nongialam ka ACHIK uba la shong shah jingit hashuwa ban don ka jingialang bad u Myntri Rangbah ka Jylla Conrad K Sangma ha CM Office. Kane ka seng kala dawa ia ka winter capital ha Tura bad ban pyntreikam ia ka Roster System jong ka Reservation Policy naduh ki snem bala leit noh.
Ki Nongialamka ACHIK bad GHSMC hadien ka jingioh khubor ba ki Pulit kila wad ia ki, u Laben Ch Marak ha ryngkat ka General Secretary Bernita R Marak bad u Co-Chairman ka GHSMC Balkarin Ch Marak, kila leit pan bah jamin lypa na Iingkashari hadien ba uwei u Pulit Circle Inspector (Sadar) Bitcing N Marak ula ujor ejahar pyrshah ia ki.
Ka Iingkashari Meghalaya High Court kala kyntait ban ai ia ka bah jamin lypa myn ha ka 11 tarik Nailar halor ka nongrim ba ka jingjia ha Tura kala buh ha ka jingma wat ia ka jingim jong Heh Sorkar kynthup ia u Myntri Rangbah ka Jylla. Ki Pulit kila pynngat ia kine ki briew hapoh ka ain Unlawful Activities (Prevention) Act, ka Meghalaya (Maintenance of Public Order) Act bad Prevention to Damage to Public Property Act.
Kumba 18 ngut ki Pulit ka Jylla, ki Home Guard bad ki CrPF kila mynsaw ha ka jingshah lun maw ha ki paidbhur myn ha ka 24 tarik Naitung bad kumba 21 tylli ki kali Sorkar bad kali shimet kila shah pynjulor bad shah wiang ding. Bun bah ki jingkhang iit jong ka CM Office ruh kila julor.
Pule lang ia kane: Bah buh jingthoh ia ki Riti Dustur tynrai : Phah ka KHADC ia ka jingtyrwa ban ioh song pisa
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
