Tura, Nailar 17 : Ha ka sngi ba ka Ri-lum Garo ka rakhe ia ka I-Day ba 77, uwei u Khynnah 6 snem ula ngam jyllop hapoh ka Shnong Mangsang, East Garo Hills.
Une u Khynnah ula ngam jyllop ha kawei ka thliew ba dap um, kaba la shu ieh khlem tap da kawei ka kompani shna surok.
Kane ka jingjia kala jia ha ka 15 tarik Nailar hajan ka madan Mangsang katba ka jingialehkai phutbol ka dang iaid shakhmat.
Une u Khynnah 6 snem ba kyrteng u Berdinand N Areng bad uwei pat uba 12 snem Aisaritha Sangma kiba dei na ka shnong Mangsang Bamil, kila ialehkai hajan kane ka thliew khlem da tip ia ka jingma kaba ap ia ki.
Kane ka kompani bala suba dei ka CCIL, kala shu ieh ia kawei ka thliew bala ksam ban tih maw. Kane ka thliew kala dap da ka um ha ka por ba wan hap kane ka jingjia ia une u Khynnah.
Ki Nongshongshnong kila ioh jingtip ia kane ka jingjia, kilaleit wut wut ban iarap ia une u khynnah 12 snem hynrei kim shym la lapdien shuh ia u Berdinand da ki minit. Hynrei kat haduh ban da lap ia u ban ioh sei sha ryngkew, une u Khynnah ula khlad noh.
