Shillong Nailar 17: Ka Khasi Hills Autonomous District Council (KHADC) kala phah iaka jingtyrwa shaka Sorkar Jylla ba kan pyllait noh iaka song pisa na ka bynta ban buh jingthoh ia ki riti dustur bad deity tynrai jong ki riewlum Khasi.
“Ngi lah dep ban phah ia ka jingtyrwa ka jong ngi sha ka Sorkar jylla ba kan bhah tyngka bad ba kan pyllait noh ia ka pisa” ong u CEM ka KHADC u Bah Pyniaid Sing Syiem haba iakren bad ki nongthoh khubor hynne ka sngi Palei.
Ula pyntip ba ka Executive Committee kala shim ia ka rai ban iawer ia ki samla pule, kiba kloi ban leh ia ka jingwad bniah ne Research ha kaba iadei bad ki riti dustur tynrai jong ki riewlum Khasi bad ha katei ka sobjek kin don 17 tylli ki bynta kiba hap ban pynlong ia ka jingwad bniah.
“Ngi lah iakynduh arsien ia u Myntri Rangbah ka jylla ban iakren halor katei ka mat. Ka jingiakynduh ka long kaba seisoh bha bad ha ka jingshisha u Myntri Rangbah bad ka sorkar jylla kan iarap ha kaban bhah tyngka iaka KHADC ban leh ia katei ka jingwad bniah halor ka jinglong kyrpang bad ia ka riti dustur tynrai ki jong ngi” ong u CEM.
Dang shen u Myntri Rangbah ka jylla u Conrad K Sangma ula pynbna ba ka sorkar jylla kala kyntu ia baroh 3 tylli ki Autonomous District Council kiba don ha ka jylla ba kin buh jingthoh ha kaba iadei bad ka jingnang jingtip, jinglong kyrpang, ka riti ka dustur bad iaka kolshor bad ka sorkar jylla ka long kaba kloi ban bei tyngka ia ki District Council halor kane ka bynta.
