Tura, Iaiong 28 : Ha ka jingkhynra kaba jur bha, ki Pulit kila ioh ban kem ia ki nongsuhbuit ba donkti ha lyndet ka jingthaw ia ka GNLA-R na North Garo Hills.
Kine ki kynthup ia u Simon G Momin bad u Rakban Ch Momin. Ia kine ki arngut la kem myn ha ka 25 tarik na ka shnong Gambil Apal, kaba don ha North Garo Hills.
Ki Pulit kila ioh ban kurup ia kawei ka Gamexy mobile phone, kawei ka Vivo YO1 mobile phone bad kawei ka Heemax mobile phone nalor artylli ki sim card na kine ki riew bymman.
Kat kum ka jingiathuh ki Pulit, u Simon G Momin u dei u dkhot jong ka A’chik National Liberation Army (ANLA) bad u dei uba don ka jingiadei ba iajan bha bad ka A’chik Matgrik National Liberation Army (AMNLA).
Ki iathuh ba ki Pulit kila kem teng ia u Simon hapoh ka case kiengatiar ha West Khasi Hills bad kumjuh ruh ha East Garo Hills halor ka jingdonkti ban dawa pisa bad kam rahbor.
Ki Pulit ki pyntip ba ka jingtohkit mynta ka dang iaid shakhmat bad kila kyntu ia ki paidbah ba kin ai ia kino kino ki jingtip ba iadei bad ki kam dawa pisa lane kino kino ki kam beain khnang ba ki Pulit kin lah ban leh eiei. Kila pyntip ruh ba kin buhrieh ia ka kyrteng jong ki briew kiba ai khubor.
